एमालेको विधान महाधिवेशन लक्षित स्वास्थ्यकर्मीको १५१ सदस्यीय समिति गठन

काठमाडौं । एमालेको असोज ४ देखि ६ गतेसम्म आयोजना हुने विधान महाधिवेशनमा पार्टीकै स्वास्थ्यकर्मीहरुले स्वास्थ्य मापदण्ड अनुरुप परीक्षण लगायत व्यवस्थापनको काम गर्ने भएका छन् ।

केन्द्रीय सदस्य सुजिता शाक्यको अध्यक्षमा शुक्रबार बसेको बैठकले १५१ सदस्यीय स्वास्थ्य समिति बनाउने निर्णय समेत गरेको छ । बैठकमा केन्द्रीय कार्यालयका सचिव शेरबहादुर तामाङको समेत उपस्थिति थियो । भेलामा पार्टीको केन्द्रीय स्वास्थ्य विभाग, पेशागत जिल्ला कमिटी अन्तर्गतको स्वास्थ्य ईलाका कमिटी र पार्टीको घटक संगठन राष्ट्रिय स्वास्थ्यकर्मी संघ, नेपालको समेत प्रतिनिधित्व हुने गरी अगुवा स्वास्थ्यकर्मीहरुको सहभागिता रहेको शाक्यले बताइन् ।

भेलाले शाक्यको संयोजकत्वमा देशभरीका अगुवा स्वास्थ्यकर्मीको सहभागिता हुने गरी १५१ सदस्यीय स्वास्थ्य समिति बनाउने निणर्य गरेको हो । बैठकले ९ वटा विशेष उपसमितिहरु चिकित्सक, नर्स, प्रयोगशाला, फार्मेशी, आयुर्वेद, जनस्वास्थ्य, पारामेडिक्स, रेडियोलोजी र सामग्रीको संयोजन गर्ने निणर्य गरेको छ ।

देशभरीबाट करिव तीन हजार भन्दा बढी प्रतिनिधि उपस्थित हुने विधान महाधिवेशनको लागि कोरोना संक्रमणको जोखिमलाई ध्यानमा राखी सोही अनुसारको सावधानी अपनाउने गरी व्यवस्थापकीय सजगता अपनाईने शाक्यले बताइन् । विधान अधिवेशनमा आउनेहरुले सकेसम्म भ्याक्सिन लगाएर आउन समेत विशेष ध्यानाकर्षण गराउने निणर्य बैठकले गरेका छ ।