धुर्मुस-सुन्तलीको फिल्म ‘म त मर्छु कि क्या हो’ आजदेखि ओटीटीमा रिलिज

काठमाडौं । सीताराम कट्टेल र कुञ्जना घिमिरेले निर्माण गरेको वेबसिरिज फिल्म ‘म त मर्छु कि क्या हो’ आजदेखि ओभर दी टप (ओटीटी) प्लेटफर्ममा रिलिज भएको छ ।

गुगल एन्ड्रोइडको ओहो एपमार्फत फिल्म हेर्न सकिने जानकारी सीतारामले दिए । धुर्मुस–सुन्तली नामले चर्चित यो जोडीकै लेखन तथा निर्देशन रहेको फिल्म सामाजिक कथावस्तुमा आधारित छ ।

वेब–सिरिज शैलीमा निर्माण गरिएको फिल्ममा महिला सशक्तीकरणको विषयवस्तु उठान गरिएको धुर्मुसले जानकारी दिए । एप डाउनलोड गरि प्रभु-पेमार्फत ३२० रुपैयाँ तिरेर दर्शकले फिल्म हेर्न सक्नेछन् ।

यो कमेडी फिल्ममा धुर्मुस–सुन्तलीसँगै रवि गिरी, विजय बराल, पल्पसा डंगोल, बुद्धि तामाङको मुख्य भूमिका छ । ‘फिल्म हलहरु बन्द भैरहेको बेला दर्शकलाई घरमै बसेर फिल्म हेर्ने सुविधाका साथ रिलिज गरेका हौं’ धुर्मुसले नेपाल प्रेसलाई भने ।

ओटीटीमा फिल्म रिलिजको यो अभ्यास सफल भए अन्य फिल्मलाई पनि रिलिज गर्ने तयारीमा धुर्मुस सुन्तली छन् ।