वीर अस्पतालमा मिर्गौला प्रत्यारोपण सेवा पुनः सुरु

काठमाडौं । कोभिड–१९ महामारीले वीर अस्पतालमा रोकिएको मिर्गौला प्रत्यारोपण सेवा पुनः सञ्चालनमा आएको छ । मिर्गौला प्रत्यारोपण समितीको मंगलबार बसेको बैठकमा सो निर्णय भएको हो ।

अस्पतालमा २०७६ चैत ४ गतेसम्म नियमित रुपमा मिर्गौला प्रत्यारोपण भइरहेको थियो । ०७६ चैत ११ गतेदेखि लकडाउन भएपछि सेवा रोकिएको अस्पतालका कार्यकारी प्रमुख अधिकारी भुपेन्द्र बस्नेतले जानकारी दिए ।

उनका अनुसार स्वास्थ्य तथा जनसंख्या मन्त्रालयले आकस्मिकबाहेक इलेक्टिभ सर्जरी सेवा बन्द गर्न निर्देशन दिएको थियो । मन्त्रालयले वीरलाई कोभिड यूनिफाईडमा रुपान्तरण गरेपछि सेवा बन्द भएको थियो ।

अहिले नयाँ भवनमा कोरोना संक्रमितको उपचार सुरु भएकोले सेवालाई निरन्तरता दिने निर्णय भएको बस्नेतले जानकारी दिए । मिर्गौला प्रत्यारोपणका लागि स्वास्थ्यकर्मी समेत तयारी अवस्थामा रहेका उनले बताए ।