संक्रमण दर १५ प्रतिशतमा झरे फिल्म क्षेत्र खुलाउने सीसीएमसीको कार्यविधि

काठमाडौं । अहिले सबैजनाको चासो फिल्मसहित मनोरञ्जन क्षेत्र कसरी र कहिले खुल्छन् भन्नेमा छ । कोभिड संकट व्यवस्थापन केन्द्र (सीसीएमसी)ले भदौ १ गतेदेखि लागू गरेको स्मार्ट लकडाउनको कार्यविधिमा कस्तो परिस्थितीमा फिल्म क्षेत्र खुलाउन सकिने भन्ने योजना समावेश छ ।

संक्रमणको दर हेरेर मुलुकलाई चार जोनमा विभाजन गर्ने र सोहीअनुसार मनोरञ्जन क्षेत्र खुलाउन सकिने कार्यविधिमा उल्लेख छ । सीसीएमसीले संक्रमणको दर हेरेर रेड, एम्बर, येल्लो र ग्रीन जोन छुट्याएको छ । सोहीअनुसार निषेधाज्ञा लागू गर्न जिल्ला प्रशासन कार्यालयलाई सर्कुलर गरिएको छ ।

संक्रमितको संख्या ६५ प्रतिशतभन्दा माथि भए रेड जोन, ३१ देखि ६५ प्रतिशत भए एम्बर, १६ देखि ३० प्रतिशतमा भए पहेंलो संकेतमा सफ्ट लकडाउन, १५ प्रतिशतभन्दा कम भए हरियो अर्थात मिनिमल लकडाउनको नियम ल्याइएको छ ।

रेड, एम्बर र येल्लो जोनका मनोरञ्जन क्षेत्रमा भर्चुअल मोडमा मात्र सेवा संचालन गर्न अनुमति दिइएको छ भने संक्रमण दर १५ प्रतिशत कम भएमा अर्थात हरियो (मिनिमल लकडाउन)मा स्वास्थ्य मापदण्डको पालना गर्दै सिनेमा हल संचालन गर्न अनुमति दिइने उल्लेख छ ।

तर, अहिले मुलुकको दैनिक संक्रमण दर २४ प्रतिशतभन्दा तल घट्न सकेको छैन ।