फिल्म क्षेत्रको ऋण तिर्ने भाखा एक वर्षलाई थपियो, निर्माता र हल संचालकलाई राहत

काठमाडौं । कोभिड-१९ महामारीले प्रभावित भएर ऋणको सावाँब्याज तिर्न नसकेका चलचित्र क्षेत्रका ऋणीलाई पनि सरकारले भुक्तानीको अवधि थप गरेको छ । शुक्रबार सार्वजनिक गरिएको चालु आर्थिक वर्षको मौद्रिक नीतिमा उल्लेख भएको यो व्यवस्थाले केही हदसम्म भएपनि फिल्म क्षेत्रलाई राहत मिलेको छ ।

कोभिड-१९ बाट अति प्रभावित चलचित्र क्षेत्रमा प्रवाह भएको कर्जा बैंक तथा वित्तीय संस्थाले मूल्याङ्कन गरी २०७८ पुस मसान्तसम्ममा पुनरसंरचना तथा पुनरतालिकीकरण गर्न सक्ने व्यवस्था मिलाइने जनाइएको छ । यस्तै, मनोरञ्जन व्यवसायका ऋणीले २०७८ पुससम्म भुक्तान गर्नुपर्ने साँवा तथा ब्याज दायित्वको समयावधि एक वर्षसम्म थप गरी कम्तिमा चार किस्तामा भुक्तानी गर्न सक्ने व्यवस्था गरिने जनाइएको छ ।

यसअघि सरकारले असार मसान्तसम्म ऋण तिर्नुपर्ने जनाएको थियो । तर, मौद्रिक नीतिमा भाखा एकवर्षलाई थप गरिएपछि यसले फिल्म निर्माता र हल संचालकलाई ठूलो राहत मिलेको छ । महामारीको दोस्रो लहरको कारण अहिले मुलुकभरका ११० वटा भन्दा बढी फिल्म हल बन्द छन् भने कतिपयले ऋण लिएर पनि व्यवसाय थालेका थिए ।