प्रदेश २ : सांसद विकास कोष रकमको लफडाले प्रदेशसभा बैठकमा ढिलाइ

जनकपुरधाम । सांसद विकास कोषको रकम बढाउने विषयमा सहमति नजुट्दा प्रदेश २ प्रदेशसभा बैठक बस्न ढिला भएको छ ।

दिउँसो १ बजेका लागि डाकिएको प्रदेशसभा बैठक अहिलेसम्म शुरू भएको छैन । प्रतिपक्षी दल नेकपा एमाले र नेकपा माओवादी केन्द्रसँग सत्तारुढ दलका नेताहरू आन्तरिक छलफल गरिरहेका छन् ।

प्रतिपक्षी दल एमाले र माओवादीका सांसदले प्रत्यक्ष निर्वाचित सांसदलाई ५ करोड र समानुपातिक सांसदलाई अढाई करोड बजेट दिनुपर्ने माग गरेका छन् । यो मागमा सत्तापक्षका अधिकांस सांसद सहमत छन् । यो विषय टुंगो नलगाए बैठक शुरू गर्दा अवरुद्ध गर्ने चेतावनी प्रतिपक्षी दलले दिएपछि सरकार सकसमा परेको छ ।

असार १ मा आर्थिक मामिला तथा कानून मन्त्री विजयकुमार यादवले प्रस्तुत गरेको अगामी आर्थिक वर्षको बजेटमाथि छलफलका लागि यसअघि डाकिएको दुई वटा बैठक स्थगित गरिएको थियो ।

आज मन्त्री यादवले बजेटमाथि छलफलको प्रस्ताव गर्ने र त्यसपछि छलफल प्रारम्भ हुने कार्यसूची छ । साथै सदनमा उठेको प्रश्नको जवाफ पनि मन्त्री यादवले आजै दिने छन् ।