वीर अस्पतालमा ५०६ बेड थपिने, ८३१ पुल दरबन्दी पनि थपियो

काठमाडौं । कोरोनाको तेस्रो लहरलाई ध्यानमा राख्दै वीर अस्पतालमा शैय्या संख्यामा थप गरिने भएको छ । ५०६ बेड थप्ने निर्णयसँगै वीरमा कूल शैय्या संख्या ९६६ हुने भएको छ । अहिले वीरमा ४६० शैय्या छन् ।

साथै, ८३१ जनाको पुल दरबन्दी पनि थपिएको स्वास्थ्य मन्त्रालयले जनाएको छ । मन्त्रालयका अनुसार १२ औं तहका कर्मचारी कार्यकारी निर्देशक रहने गरी पुल दरबन्दी थपिएको हो। दरबन्दी थप्न असार २१ गते बैठक बसेको थियो । वीरमा अब पुल दरबन्दीमा थपिएका ८३१ जनासहित १ हजार ५१८ जनाको दरबन्दी पुगेको छ । त्यहाँ पहिला १९ विभाग थिए भने त्यसलाई बढाएर २९ र ७ वटा इकाईलाई बढाएर ९ पुर्‍याइएको छ।

१२औं तहका कार्यकारी निर्देशकसहित प्रशासनतर्फको सहसचिव पनि १ जनाको दरबन्दी थपिएको जनाइएको छ । साथै, विभिन्न समूहमा ११ औं तहका १७ जना, ९ र १० औं तहका ११६ जना, ८ औं तहका मेडिकल अफिसर ४९ जना, डेन्टल सर्जन ४ जना, नर्सिङ अधिकृत ७ र ८ औं तहका १९ जना, ७ र ८ औं तहका प्राविधिक अधिकृत ३३ जना, रा प तृतिय प्रशासन लेखा विविध २ जना, रा प अनंकृत प्रथम प्रशासन लेखा ११ जना, स्टाफ नर्स ५र६र७ औं तहमा ६८५, स्वास्थ्य प्राविधिक ५३ जना र १५५ जना श्रेणीविहिन दरबन्दी पनि थपिएको छ ।

सरकारले दोस्रो लहरको समय वीरलाई केन्द्रिय कोभिड अस्पतालको रुपमा बनाउने निर्णय गरेको थियो जसको प्रमुखमा डा. जागेश्वर गौतमलाई पठाइएको थियो ।