बीपी प्रतिष्ठानका पदाधिकारीलाई बर्खास्त गर्न केसीको माग

काठमाडौं । सामाजिक अभियन्ता डा. गोविन्द केसीले धरानको बीपी कोइराला स्वास्थ्य विज्ञान प्रतिष्ठानका चार जना पदाधिकारीलाई बर्खास्त गर्न माग गरेका छन् ।

शुक्रबार बिज्ञप्ति जारी गर्दै उनले प्रतिष्ठानका उपकुलपति, रजिष्ट्रार, रेक्टर र निर्देशक गरी चार जना पदाधिकारीलाई बर्खास्त गर्न माग गरेका हुन् ।

उनले विज्ञप्तिमा लेखेका छन्- ‘प्रतिष्ठानका पदाधिकारीले बर्बादीतिर धकेलेका छन् । चारजनाले नैतिकता र वैधता गुमाइसकेका छन् । तत्काल पद खाली गर्नुपर्छ ।’

साथै उनले मापदण्ड निर्धारण समितिले सुझाव दिएअनुसार बरिष्ठता, इमान्दारी र योग्यताका आधारमा नयाँ पदाधिकारी नियुक्त गर्नसमेत आग्रह गरेका छन् ।

बीपी प्रतिष्ठानमा १८ दिनदेखि अनियमितताकाे विरोधमा प्रतिष्ठानका चिकित्सक, स्वास्थ्यकर्मी, कर्मचारी र विद्यार्थीले शुद्धिकरणको माग राख्दै आन्दोलन गरिरहेका छन् ।