नाट्यकर्मीलाई कोभिड खोप उपलब्ध गराउन माग

काठमाडौं । नाट्यकर्मीको छाता संस्था नाट्यकर्मी महासंघले नाट्यकर्मीका लागि कोभिड-१९ विरुद्धको खोपको व्यवस्थापन गर्न सरकारसँग आग्रह गरेको छ ।

महासंघले विज्ञप्ति जारी गर्दै नाट्यकर्मीलाई प्राथमिकताका साथ खोप उपलब्ध गराउन आग्रह गरेको छ । महासंघ अध्यक्ष राजेन्द्र रिमालले स्वास्थ्य नागरिकको संविधानप्रदत्त अधिकार भएकाले खोप उपलब्ध गराउन आग्रह गरे ।

महासंघले नेपाली नाट्यकर्मीहरुले हरेक विपतमा राज्यलाई सहयोग गर्दै आइरहेको स्मरण गराउँदै खोप उपलब्ध गराउन भनिएको हो ।

महामारीको कारण बन्द गरिएका नाट्यशालालाई अन्य क्षेत्रहरुलाई जस्तै स्वास्थ्य सावधानी अपनाएर सञ्चालन अनुमति प्रदान गर्न समेत माग गरिएको छ । महासंघले भनेको छ : पेशागत रुपमै नाटकमा आबद्ध नाट्यकर्मी लामो समयदेखि पेशा खोसिएर बस्नुपरेको छ जसले जीवनयापनमा नै कठिनाई उत्पन्न भएको छ ।’