कलाकारहरुद्वारा संचालित सिन्धु सहयोग कोषमा पहिलो दिनमै २२ लाख संकलन

काठमाडौं । बाढीप्रभावित सिन्धुपाल्चोकका बासिन्दालाई सहायता उपलब्ध गराउन कलाकारहरुले स्थापना गरेको सिन्धु सहयोग कोषमा पहिलो दिनमै २२ लाख रुपैयाँ संकलन भएको छ ।

बिहीबार राजधानीको बत्तीसपुतलीमा भेला भएर कलाकारहरुले सहायता कोष स्थापनाको घोषणा गर्दै रकम सहयोगका लागि आह्वान गरेका छन् ।

पहिलो दिनमै झन्डै २२ लाख संकलन भएको कलाकारद्वारा संचालित सिन्धु सहयोग कोषका संयोजक एवं बरिष्ठ अभिनेता कृष्ण मल्लले जनाए । ‘पहिलो दिनमै उपलब्ध भएको सहयोगलाई हेर्दा हामी उत्साहित छौं’ मल्लले नेपाल प्रेसलाई भने ।

संकलन भएको उक्त रकम बैंकमा खाता खोलेर राखिने र थप सहायताका लागि आह्वान गरिने मल्लले बताए । अहिलेको स्थितीमा हेलम्बु, पाँचपोखरी र मेलम्चीका पीडितलाई सहयोग गरिने तयारी भएको छ ।

बस्ती निर्माणका लागि कर्पोरेट घरानालाई पनि आग्रह गरिने र निर्माण सुरु हुने बेला रकम झिक्ने तयारी भएको छ । कलाकारहरुले आफ्ना प्रशंसक र शुभेच्छकुलाई समेत कोषमा रकम संकलन गर्न आह्वान गरेका छन् ।

बिहीबारको भेलामा नेपाली फिल्मका कलाकारहरु सहभागि थिए । शनिबार पुनः सचिवालयको बैठक बसेर थप योजना बनाउने तयारी छ । गतसाता मल्ल संयोजक र करिश्मा मानन्धर सह संयोजक रहेको समिति गठन भएको थियो ।