तीनहजार फिल्मकर्मीलाई कोभिड खोप लगाउन बोर्डले लेख्यो स्वास्थ्य मन्त्रालयलाई पत्र

काठमाडौं । नेपाली फिल्म क्षेत्रका तीन हजार जनालाई कोभिड-१९ विरुद्धको खोप लगाउन माग गर्दै चलचित्र विकास बोर्डले स्वास्थ्य मन्त्रालयलाई पत्र लेखेको छ ।

बोर्डको कोभिड-१९ व्यवस्थापन हेर्ने संयोजक तथा बोर्ड सदस्य राज कट्वालले उक्त मागसहितको पत्र शुक्रबार स्वास्थ्य मन्त्रालयमा बुझाएका छन् । पत्र बुझ्दै फिल्मकर्मीलाई खोप लगाउन मन्त्रालय सकारात्मक रहेको जवाफ आफूले पाएको कट्वालले बताए ।

खोपबारे छलफल गर्न स्वास्थ्यमन्त्री हृदयेश त्रिपाठीले आइतबार फिल्मकर्मीलाई मन्त्रालयमा बोलाएका छन् । मन्त्रीसँगको भेटमा फिल्मकर्मीलाई खोप लगाउन पहल गरिने र कोभिड-१९ रोकथाममा फिल्मकर्मीको भूमिकाबारे छलफल हुने सदस्य कट्वालले बताए ।

‘फिल्मकर्मीलाई खोप लगाउन हामीले प्रयत्न गरिरहेका छौं र पहलकद्मी लिइरहेका छौं’ कट्वालले नेपाल प्रेसलाई भने, ‘स्वास्थ्य मन्त्रालयलाई दबाब दिइरहेका छौं र मन्त्रालय सकारात्मक पनि छ ।’