उपाध्यायप्रति श्रद्धाञ्जली दिन प्रधानमन्त्री प्रचण्ड नेकपा एसको कार्यालयमा

काठमाडौं । नेकपा एकीकृत समाजवादीका अध्यक्ष माधवकुमार नेपालका भाइ एवं सोही पार्टीका केन्द्रीय सदस्य सरोजकुमार उपाध्यायको पार्थिव शरीरमा श्रद्धाञ्जली अर्पण गर्न प्रधानमन्त्री पुष्पकमल दाहाल प्रचण्ड नेकपा एस पार्टी कार्यालयमा पुगेका छन् ।

प्रधानमन्त्री प्रचण्डले आलोकनगरस्थित एसको कार्यालयमा पुगेर श्रद्धाञ्जली अर्पण गरेका हुन् ।

यस्तै नेकपा एकता राष्ट्रिय अभियानका संयोजक वामदेव गौतम पनि श्रद्धाञ्जली अर्पण गर्न पार्टी कार्यालय पुगेका छन् ।

गएको शनिबार शंखमूलस्थित एक रेस्टुरेन्टको छैटौं तलाबाट खसेर घाइते भएका उपाध्यायको निधन भएको थियो । नेकपा एसको केन्द्रीय सदस्य उनी पार्टीको विज्ञान तथा प्रविधि विभाग प्रमुख पनि हुन् ।