मधेसको सबैभन्दा ठूलो दल एमाले पहिलोपटक सत्तामा, को बन्दैछ मधेस प्रदेशको सभामुख ?
नेपाल प्रेस
२०७९ पुष २५ गते ११:००
जनकपुरधाम । मधेस प्रदेशको पहिलो दल बने पनि मुख्यमन्त्री नपाएको नेकपा एमालेले मधेसमा पहिलोपटक राजकीय पदमा आफ्नो प्रतिनिधित्व गराउँदैछ ।
सत्ता गठबन्धनको भागबण्डामा एमालेले मधेसको सभामुख पाएको छ । यसअघि पाँचै वर्ष एमाले मधेसमा प्रतिपक्ष थियो । यसपटक २३ सीटसहित मधेस प्रदेशको पहिलो दल बनेको एमालेले सभामुखसहित सरकारमा सहभागिता जनाउँदै छ ।
सभामुखमा एमालेबाट रामचन्द्र मण्डल र राजकुमार लेखीमध्ये एकजनाको नाम टुंगो लाग्दैछ । एमालेका मधेस प्रदेश संसदीय दलका नेता सरोज कुमार यादवले भने यसबारेमा पार्टीले कुनै निर्णय नगरेकाे बताए ।
लेखी सप्तरी १ (१) बाट निर्वाचित प्रदेश सभा सदस्य तथा एमाले केन्द्रीय सदस्य हुनु । त्यस्तै मण्डल धनुषा १(१)बाट निर्वाचित प्रदेश सभा सदस्य तथा धनुषा इन्चार्ज हुन् ।
यसअघि यी दुवै नेता संसदीय दलको नेताका पनि आकांक्षी थिए ।
मधेस प्रदेशको सभामुख र उपसभामुखका लागि पुस ३० गते मनोनयन दर्ता र माघ २ गते निर्वाचनको मिति तोकिएको छ ।
नेपाल प्रेस
प्रकाशित: २०७९ पुष २५ गते ११:००
प्रतिक्रिया
सम्बन्धित खवर
