नेकपा एसको सिद्धान्त मानेर आउनेलाई खुल्ला छ, तर एमाले र माओवादीसँग तत्काल एकता हुन्न : उपाध्यक्ष जयन्ती राई

काठमाडौं। नेकपा एसकी उपाध्यक्ष जयन्ती राईले पार्टी अहिले कसैसँग एकताभन्दा पनि क्रान्तिकारी कम्युनिष्ट पार्टी बन्ने अठोटका साथ संगठन निर्माणमा अघि बढ्ने बताएकी छन् ।

राष्ट्रियसभा सांसदसमेत रहेकी उनले एमाले र माओवादीसँगको एकतालाई भने तत्काललाई खारेज गरिन् । तर, वाम एकताका लागि पार्टीले सक्ने भूमिका निभाउने उनको भनाइ छ ।

‘कम्युनिष्ट पार्टीबीचको एकताका लागि हामीले सक्ने गर्छौं । प्रतिगमन भन्दै उफ्रिएका प्रचण्डलाई अहिले सबै सच्चियो । कम्युनिष्ट त भनेकै छन् वामपन्थी पनि भनेका छन् । तर, व्यवहार देखाएनन्’, उनले नेपाल प्रेससँग भनिन्, ‘संगठन गठन र पुनर्गठन व्यापक बनाउँछौं । जनजीविका, भ्रष्टाचारका कुरा सडकमा र सदनमा लान्छौं ।’

उपाध्यक्ष राईले नेकपा एसको सिद्धान्त र नीति मानेर आउनेलाई भने सधैँ ढोका खुल्ला राखिने बताएकी छन् । माओवादी र एमालेसँग एकता असम्भव नै भन्ने चाहिँ नहुने उनको भनाइ छ ।

अहिले सबै हल्लामात्र फिँजाइएको भन्दै उनले यतिबेलै चाहिँ वातावरण नभएको बताइन् । चुनावअघि र अहिले एमालेका केही नेताले एकताको हल्ला फिँजाएर आफ्ना कार्यकर्तालाई भ्रम सिर्जना गरेको उनको दाबी छ ।

‘एकता भनेको एउटा पार्टी अर्कोमा जाने कुरामात्र भएन । कि हामी सबै स्वीकारेर जानुपर्‍यो । अहिले जानु भनेको विलय हुने हो । हामी पहिला शक्ति निर्माण गर्छौं । छरिएर रहेका शक्ति एकढिक्का हुन्छौं । अन्य पार्टीका साथीहरू पनि भित्रिन खोजिरहनुभएको छ । उहाँहरूलाई ल्याउँछौं, नयाँ विचार नयाँ बानी व्यवहार देखाउनुपर्छ । भिन्न गरेर जानुपर्छ’, नेतृ राईले भनिन् ।

पछिल्लो दिनमा चलिरहेको बैठकमा सबैजना उत्साही भएको भन्दै उनले जनताको एजेण्डामा साथ दिने साँच्चै एउटा क्रान्तिकारी कम्युनिष्ट पार्टी आवश्यक रहेको औंल्याइन् ।

नेकपा एस अहिले सरकारमा नजाने भन्दै उनले गुण र दोषको आधारमा समर्थन र विरोध गर्ने बताइन् । आफूहरूमाथि गर्ने व्यवहार, न्यूनतम साझा कार्यक्रमलाई मात्र हेरेर प्रचण्ड सरकारलाई समर्थन गर्नेरनगर्ने निर्णय गर्ने उपाध्यक्ष राईले उल्लेख गरिन् ।

उनले थपिन्, ‘राजावादी, विखण्डनकारी, चरम अवसरवादी, गैरनागरिक र वामपन्थीको खिचडी सरकार बन्यो । यस्तो सरकारबाट आशा त के गर्न सकिन्छ र । त्यही हामीलाई कस्तो व्यवहार गर्छ । न्यूनतम साझा कार्यक्रम हेर्छौं । अनि समर्थनबारे टुंग्याउँछौं । अहिले सरकारमा जान तम्सिन हुँदैन ।’

अहिलेको गठबन्धन भत्किनुमा उनले मुख्य दोष देउवालाई दिएकी छन् । त्यसपछि प्रचण्ड र केपी ओलीको भूमिकामा पनि उनले प्रश्न गरिन् । आफ्नो पार्टीका अध्यक्ष माधव नेपाललाई भने यो प्रक्रियामा गुमराहमा राखिएको उनको भनाइ छ ।

उपाध्यक्ष राईसँगको विस्तृत कुराकारी भने आज दिउँसो प्रकाशन हुनेछ ।