अर्घाखाँचीमा एमालेको ’क्लीनस्वीप‘
टोपबहादुर रायमाझीको लगातार चौथो संसद् यात्रा
२०७९ मंसिर ७ गते २३:३३
रुपन्देही । नेकपा एमालेका उम्मेदवारले अर्घाखाँचीका तीनै क्षेत्रमा विजयी बनेर सत्तारुढ दललाई क्लीनस्वीप बनाएको छ । प्रतिनिधि सभामा एमाले सचिव टोपबहादुर रायमाझी र प्रदेश सभामा चेतनारायण आचार्य र रामजी घिमिरे विजयी भएका हुन् ।
नेता रायमाझीले पूर्व उपसभामुख तथा कांग्रेस केन्द्रीय सदस्य पुष्पा भुसाललाई पराजित गरेका हुन् ।
टोपबहादुरले ४८हजार १७२ मत ल्याउँदा पुष्पाले ४६ हजार ४४२ मत ल्याएकी छन् । रायमाझीले १७३० मतान्तरले जित हात पारेका छन् ।
रायमाझी ०६४ सालदेखि लगातार यहाँबाट जित्दै आएका छन् । पटक पटक मन्त्री तथा उपप्रधानमन्त्री बनेका उनले यसअघि पनि यसै गरी अन्य पार्टीको मत ल्याएर जित्ने गरेका थिए ।
प्रदेशसभा १ मा एमालेका केन्द्रीय सदस्य चेतनारायण आचार्य र २ मा रामजी घिमिरे विजयी भएका छन् । यसअघि पनि सोही क्षेत्रबाट निर्वाचित भएका आचार्य लुम्बिनी प्रदेशको आन्तरिक मामिला तथा कानुन मन्त्री बनेका थिए ।
आचार्यले सत्ता गठबन्धनबाट उम्मेदवार बनेका राष्ट्रिय जनमोर्चाका सागर केसीलाई ७ सय ४० मतान्तरले पराजित गरेका हुन्। आचार्यले २० हजार ५ सय १८ मत ल्याउँदा केसीले १९ हजार ७ सय ७८ मत प्राप्त गरेका थिए ।
२०७४ को चुनावमा पनि वाम गठबन्धनबाट आचार्य सोही क्षेत्रबाट लुम्बिनी प्रदेशसभा सदस्यमा निर्वाचित भएका थिए । उनी लुम्बिनी सरकारको आन्तरिक मामिला तथा कानुनमन्त्री भएका थिए ।
यसै गरी प्रदेश सभा २ मा रामजी प्रसाद घिमिरे २२ हजार ७ सय ७६ मत प्राप्त गरी विजयी भएका छन् । उनका प्रतिस्पर्धी नेपाली कांग्रेसका कमल प्रसाद भुसालले २१ हजार ९ सय ७५ मत प्राप्त गरेका थिए । घिमिरेले भुसाललाई ८ सय १ को मतान्तरले जितेका हुन् ।
प्रकाशित: २०७९ मंसिर ७ गते २३:३३
प्रतिक्रिया
सम्बन्धित खवर
