राप्रपाले प्रतिनिधिसभामा १५/२० सिट जित्छ : नेता दिलविकाश
काठमाडौं । राप्रपा वरिष्ठ नेता दिलविकाश राजभण्डारीले आगामी निर्वाचनमा आफ्नो पार्टीले १५/२० सीट जित्ने दाबी गरेका छन्।
बागमती प्रदेशमा राप्रपा समानुपातिक उम्मेदवारसमेत रहेका भण्डारीले निर्वाचनमा राप्रपाको निकै राम्रो नतिजा आउने दाबी गरे।
प्रतिनिधिसभा सदस्यमा प्रत्यक्षमा ८/१० सीट पक्काजस्तै भएको भन्दै समानुपातिकमा समेत राम्रो नतिजा आउने उनले बताए।
चुनावी अभियानका क्रममा नेता राजभण्डारीले बागमती प्रदेशमा मात्रै समानुपातिकमा साढे तीन लाख मत आउने दाबी गरे ।
उनले भने, ‘प्रतिनिधिसभाका १४२ निर्वाचन क्षेत्रमा हाम्रो पार्टीका उम्मेदवार छन् । प्रदेशसभामा पनि त्यही प्रकारले उठेका छन्। प्रतिनिधि सभामा ८/१० सीट हाम्रो पक्काजस्तै छ । अझै थप केही उम्मेदवारले पनि चुनाव जित्नुहुन्छ ।’
प्रतिनिधिसभामा समानुपातिकबाट कम्तीमा १५/२० सीट आउने उनको बुझाइ छ। केही जित्ने उम्मेदवारहरू समानुपातिकमा बसेकोले पार्टीलाई केही घाटा लागेको बताए।
‘खासमा हाम्रो पार्टीले अझै धेरै जित्थ्यो । केही जित्न सक्ने नेताहरू समानुपातिकमा बसिदिनुभयो’ उनले भने ।