मर्जर प्रक्रियामा रहेको कुमारी बैंकले बोलायो साधारणसभा

काठमाडौं । नेपाल क्रेडिट एण्ड कमर्श बैंकसँगै मर्जर प्रक्रियामा रहेको कुमारी बैंक लिमिटेडले लाभांश प्रस्ताव पारित गर्न साधारणसभा बोलाएको छ । बैंकले कात्तिक २१ गते बाइसौं वार्षिक साधारणसभा बोलाएको हो ।

साधारणसभा कुमारी बैंकको नक्साल कार्यालयमा बिहान ११ बजे सुरु हुनेछ । सभाले सामाजिक उत्तरदायित्व बहन गर्दा सीमाभन्दा बढी भएको खर्च अनुमोदन गर्ने, मर्जर तथा एक्विजिशन गर्न सञ्चालक समितिबाट गठित मर्जर समिति तथा सोले गरेको कार्य अनुमोदन गर्ने, मर्जर तथा एक्विजिशनसम्बन्धी अन्य कार्य गर्न सञ्चालक समितिलाई आवश्यक सम्पूर्ण अख्तियारी दिने, कर प्रयोजनसहित चुक्ता पूँजीको १२.५० प्रतिशत नगद लाभांश वितरण गर्नेलगायतका प्रस्तावहरु पारित गर्नेछ ।

साधारणसभा प्रयोजनार्थ बैंकले कात्तिक १४ गते बुकक्लोज गर्ने भएको छ । यद्यपि मर्जर प्रक्रियामा रहेका कारण बैंकको शेयर कारोबार भने दोस्रो बजारमा बन्द रहेको छ । यसअनुसार असोज १० गतेसम्म नेप्सेमा कारोबार भई कायम शेयरधनीहरुले बैंकको साधारणसभामा सहभागिता जनाउन तथा बैंकले वितरण गर्ने लाभांश प्राप्त गर्न सक्नेछन् ।