विदेशी प्रेमिकासँग कोर्ट म्यारिज गरेको एक वर्षपछि भोज खुवाउँदै कर्मा

काठमाडौं । अभिनेता कर्माले एक वर्षअघि विवाह गरेको सार्वजनिक भएको छ ।

विदेशी प्रेमिका एनी सोफीसँग कोर्ट म्यारिज गरेका उनले आउँदो भदौ ४ गते प्रितिभोज आयोजना गरेका छन् ।

नेपाल प्रेससँग कुरा गर्दै कर्माले गत वर्षको १ सेप्टेम्बरमा अदालति विवाह गरेको जानकारी दिए । त्यसबेला कोरोनाको प्रकोपका कारण वैवाहिक समारोह आयोजना गर्न नसकेकाले अहिले आएर प्रितिभोज गर्न लागेको उनको भनाइ छ ।

‘मैले विवाहको खबर लुकाउन चाहेको होइन, समय अनुकल नभएकाले जमघट गर्न सकिएन,’ उनले भने ।

ललितपुरस्थित न्याखाचोकमा रहेको नाकाबहिलमा आगामी शनिबार पार्टी आयोजना गरिएको छ । कर्माले आफन्त, साथीभाइ तथा चलचित्र क्षेत्रका व्यक्तिहरुलाई पार्टीमा निम्तो गरिरहेका छन् ।

एक दशकभन्दा बढी समयदेखि नेपाली चलचित्रमा सक्रिय कर्माले सन् २००८ मा ‘सानो संसार’बाट डेब्यू गरेका हुन् । त्यसयता उनले दुई दर्जनभन्दा बढी चलचित्रमा अभिनय गरिसकेका छन् । उनी अभिनित सर्वाधिक सफल फिल्म ‘लुट’ हो ।