सेजभित्र गुट्खा उद्योग खोल्न अनुमतिको फाइलमा मुख्यसचिवले लगाए ‘ब्रेक’

काठमाडौं । विशेष आर्थिक क्षेत्र (सेज) मा गुट्खा उद्योग खोल्ने फाइल उद्योग मन्त्रालयमा रोकिएको छ । मन्त्री दिलेन्द्र बडूले तयार बनाएको फाइल मुख्य सचिव शंकरदास बैरागीले केही समयपछि हेरौंला भनेपछि सेजभित्र गुट्खा खोल्ने अनुमति केही समयका लागि रोकिएको हो ।

उद्योगमन्त्रीले तयार पारेको फाइल मुख्य सचिवले हेर्न नमानेपछि पिके श्री इन्डस्ट्रिज प्रालिका सञ्चालक प्रधानमन्त्रीपत्नी आरजु राणालाई भेटेर लबिङ गरेको स्रोतले बतायो । जसरी पनि सेजमा गुट्खा उद्योग सञ्चन गर्ने भन्दै उद्योग सञ्चालन गर्ने व्यक्तिहरूले राजनीतिक पहुँचका लागि भेटघाट बढाएका छन् ।

सेजभित्र मदिरा र गुट्खा उद्योग खोल्नका लागि उद्योग मन्त्रालयले अर्थमन्त्रालयसँग राय मागेको थियो । अर्थसचिव मधुकुमार मरासिनीले मदिरा उद्योगलाई नहुने भन्दै गुट्खा उद्योगका लागि सहमति दिएका थिए ।

अर्थमन्त्री जनार्दन शर्माले राजीनामा दिएको बेलामा नै अर्थसचिव मारासिनीले सेजमा गुट्खा उद्योग खोल्न सहमति दिएको स्रोतले बतायो ।

सेजमा मदिरा, हातहतियार, विष्फोटक पदार्थ र गुट्खालगायत सुर्तीजन्य उद्योग स्थापना गर्न नपाइने व्यवस्था छ । तर, सरकारले नियम नै संशोधन गरेर पिके श्री इन्डस्ट्रिज प्रालिलाई लक्षित गरी गुट्खा उद्योगका लागि सहमति दिने गरी उद्योग मन्त्रालयमा फाइल तयार भएको थियो । पिकेश्रीले उद्योग स्थापना गर्न राजस्वसमेत तिरिसकेको छ । मन्त्री जसरी भएपनि सेजमा गुट्खा उद्योग खोल्न दिनेगरी लागिरहेका छन् ।

नियमावली नै संशोधन गरेर सेजभित्र गुट्खा उद्योग खोल्न अनुमति दिने चलखेल

हिजोको मन्त्रिपरिषद्‍बाट नै सेजमा गुट्खा उद्योग सञ्चान गर्न पी के श्री इन्ड्रष्ट्रिज प्रालि अनुमति दिने तयारी गरेकोमा मुख्यसचिवले फाइल हेर्न नमानेपछि रोकिएको हो ।

एउटा निश्चित कम्पनीलाई नै तोकेर कानुन संशवधन गर्न खोज्नु बदमासी भएको भन्दै मन्त्रालयभित्रै टिप्पणी बढेको छ । मन्त्रीस्तरीय निर्णयबाटै पिकेश्रीलाई अनुमति दिने तयारी गरिएकोमा विवाद आउनसक्ने भन्दै मन्त्रिपरषद्‍बाटै पास गर्न लागिएको बताइएको छ ।

गुट्खा उद्योग सञ्चालनका लागि उद्योग, वाणिज्य तथा आपूर्ति मन्त्रालयले सेजको नियमावली नै संसोधन गर्न लागेको छ । सेजमा स्थापना गर्न नपाइने उद्योगहरूको सूची संशोधन गरेर गुट्खा, मदिरा र सुर्तीजन्य उद्योगलाई समेत अनुमति दिने तयारी गरिएको थियो । तर,गुट्खा उद्योग मात्रै सञ्चालन गर्न पाइने गरेर संशोधन हुने तयारीमा रहेको छ ।

सेजमा गुट्खा र मदिराजन्य वस्तु उत्पादन नियमावली संशोधनका लागि औद्योगिक प्रवर्द्धन बोर्डमा पुगेको छ । अब बोर्डले भने गुट्खा उद्योग मात्रै सञ्चालन गर्ने स्वीकृति दिन लागेको हो ।

विदेश वस्तु निर्यात गर्नको लागि भनेर स्थापना भएको सेजमा उद्योगले करदेखि जग्गा र भवनको भाडासम्ममा छुट दिने गरेको छ । नियमावली संशोधन गरेर गुट्खा उत्पादन गर्न दिइए यस्ता उद्योगले पनि यी सहुलियत र छुट पाउनेछन् ।

भैरहवा र सिमरामा सेजको उद्योग स्थापना गर्ने प्लटहरू छन् । सरकारले मदिरा र सुर्ती तथा गुट्खाजन्य वस्तुको उत्पादन सेजमा नै गर्न दिने भन्ने भएपछि प्लटहरूको भाडा सम्झौता भइरहेको छ ।