यस्तो छ छक्का पञ्जा ४ मा दीपकराज गिरिको लुक्स

काठमाडौं । आजकल कही नभेटिने भिडियो टिकटकमा छ्यापछ्याप्ती भेटिन्छन् । टिकटकमा राखिएकै भिडियोको कारण केहीलाई न्याय मिलेको छ भने त्यही टिकटकमा राखिएकै भिडियोको कारण तनाव पनि बेहोरिरहेका छन् ।

अहिले ठ्याक्कै यस्तै भएको छ छक्का पञ्जाको टिमलाई । लगातार ३ वटा सिरिज हिट भएपछि छक्का पन्जा ४ निर्माण गरिरहेको उक्त चलचित्रको सुटिङ केही दिन अघिबाट शुरु भएको थियाे ।

फिल्मको छायांकन विभिन्न ठाउँमा भइरहेको छ । फिल्म सुटिङ भइरहेको हेर्न मानिसहरुको भीड लागेको छ ।  त्यही सुटिङ हेर्न पुगेका एक व्यक्तिले सुटिङ भइरहेको भिडियो खिचे र टिकटकमा छक्का पञ्जा ४ मा दीपकराज गिरिकाे फस्ट लुक भन्दै भिडियो अपलोड गरे ।

ती व्यक्तिले सार्वजनिक गरेको भिडियोमा पाँचखाल कारागारबाट निस्कदै गरेको दीपकराज गिरीलाई पञ्चेबाजाले स्वागत गरेको देखिन्छ । यो भिडियो सार्वजनिक भएलगतै यता निर्माण पक्ष तनाबमा छन् ।

निर्माण पक्षले उक्त भिडियो टिकटकबाट हटाउन आग्रह गरिसकेको छक्का पन्जा ४ की कलाकार दीपाश्री निरौलाले बताइन् ।

उनले नेपालप्रेससँग भनिन्,‘ मैले पनि त्यो भिडियो हेरे । हामीले हटाउनु भनेको छौं । अब के गर्ने भनेर टिमसँग छलफल गछौं । ’अहिले सम्म उक्त भिडियो हटाएको छैन । छक्का पन्जा ४ घोषणा हुनुअघि निर्माण पक्षले अर्के नाममा फिल्म बनाउने भनेर दर्शकलाई झुक्काएको थियो ।