भुवन केसीलाई बधाई दिँदै अनमोलले भनेः आजबाट तपाईंको भूमिका अझ गहन भएको छ

काठमाडौं । नेपाली सिने जगतका दिग्गज कलाकार एवं सफल अभिनेता भुवन केसी चलचित्र विकास बोर्डको अध्यक्षमा नियुक्त भएपछि खुसी व्यक्त गर्दै छोरा अनमोल केसीले आफ्नो सामाजिक सञ्जालमा एक स्टाट्स लेखेका छन् । सोमबार बसेको मन्त्रिपरिषद बैठकले केसीलाई विकास बोर्डको अध्यक्ष बनाउने निर्णय गरेको थियो । नवनियुक्त अध्यक्ष केसीले आजैबाट पदभारसमेत ग्रहण गरिसकेका छन् ।

बुवाले अध्यक्षको पदभार सम्हाल्ने खबर साझा भएपछि खुशी व्यक्त गर्दै अनमोलले भुवन आफ्नो पितामात्र नभएर मार्गदर्शक तथा प्रेरणा रहेको र आफूले पनि त्यही पाइलालाई पछ्याएर यहाँसम्म पुग्न सफल भएको बताएका छन् ।

‘बाटो हिँड्ने मान्छेभन्दा पनि बाटो बनाइदिने मान्छे महान हुन्छन् । म तपाईंलगायत तपाईंका समकालीन हस्तीहरुकै पाइलाहरु पछ्याउँदै यहाँसम्म आइपुगेको छु’, उनी लेख्छन्, ‘आजबाट तपाईंको भूमिका झन् गहन बनेको छ । नेपाली सिनेमाको श्रीवृद्धिमा तपाईंको थप योगदान रहने कुरामा म ढुक्क छु, यो गौरवशाली अवसर प्राप्त गर्नुभएकोमा, धेरै धेरै बधाई तथा शुभकामना बाबा । मेरो मार्गदर्शक, मेरो प्रेरणा ।’