रानीको ‘खर्च माग्दिनँ’ बोलको तीज गीतमा विनाको छमछमी

काठमाडौं । तीजको गीतमा महिलाहरूले भन्ने कथा फेरिएका छन् । केही वर्ष अगाडिसम्म तीज गीतमा महिलाहरूले सासू, श्रीमान् र घरको कथा सुनाउँथे । तर, अहिलेका तीज गीतमा महिलाहरूले स्वावलम्बी भएका कथा सुनाउन थालेका छन् ।

गायिका रानी शाक्यको स्वरमा समावेश ‘खर्च माग्दिनँ’ बोलको तीज गीतमा पनि यस्तै भावना पोखिएको छ । सुनिता बस्नेत थापाको शब्द रहेको गीतमा दीपक शर्माको संगीत छ ।

भिडियोमा मोडल विना राउतले दर्जन बढी कोरसहरूको साथमा नृत्य गरेकी छिन् । भिडियोमा देवेन्द्र पाण्डेको निर्देशक तथा कोरियोग्राफी छ ।

विकास दाहालको सम्पादन रहेको भिडियोमा उत्सव दाहालको छायांकन छ ।

गायिका शाक्यले अन्य तीज गीत भन्दा ‘खर्च माग्दिनँ’ केही भिन्न भएको बताइन् । उनले, अबका तीज गीतले महिलाको सफलताको कथा भन्नुपर्ने पनि तर्क गरेकी छिन् ।