दीपेन्द्रको ‘के घर के डेरा’मा सुरक्षा अनुबन्धित

काठमाडाैं । दीपेन्द्र के खनालको निर्देशनमा निर्माण हुने ‘के घर के डेरा’ चलचित्रमा अभिनेत्री सुरक्षा पन्त अनुबन्धित भएकी छन् । गत आइतबारमात्रै ‘आमा’ चलचित्रकाे लागि राष्ट्रपतिको हातबाट उत्कृष्ट अभिनेत्रीको राष्ट्रिय अवार्ड जितेकी अभिनेत्री पन्तसँग निर्माण टिमले शुक्रबार ‘के घर के डेरा’को मुख्य भूमिकामा औपचारिक रुपमा लिखित सम्झौता गरेको हो ।

सुरक्षाको प्रवेशसँगै चलचित्रमा चार जना मुख्य कलाकार भएका छन् । यसअघि अभिनेता दयाहाङ राई, विपीन कार्की, वर्षा राउत र रवीन्द्र झा फाइनल भएका थिए । चलचित्र बैशाख २२ गतेबाट छायाँकनमा जानेछ । चलचित्रको सम्पूर्ण छायाँकन काठमाडौंमा गरिने निर्माण टिमले जनाएको छ ।

ए प्लस इन्टरटेन्मेन्टको ब्यानरमा शरद श्रेष्ठ, राजीव श्रेष्ठ र किरण महर्जन निर्माता रहेको चलचित्रका कार्यकारी निर्माता युवराज कार्की हुन् । सिंगे लामाको कथा, महेश दवाडीको पटकथा र संवाद, दीर्घ गुरुङको छायाँकन रहेको चलचित्र आगामी वर्ष प्रदर्शनमा ल्याउने लक्ष्य रहेकाे निर्माण टिमले जनाएकाे छ । चलचित्र वितरणको जिम्मा जीजीए ग्रुपले लिएको छ ।