आमा बनिन् काजल अग्रवाल

काठमाडौं । काजल अग्रवाल र पति गौतम किचलुले मंगलबार आफ्नो पहिलो सन्तानलाई स्वागत गरेका छन् । काजलकी बहिनी निशाले इन्स्टाग्राम स्टोरीमा तस्बिर राखेकी छन् । उनले लेखेकी छिन्,‘यो खुसीको दिन हो। म तपाईंहरू सबैसँग केही विशेष समाचार साझा गर्न पर्खन सक्दिन ।’

पछि इन्डियन एक्सप्रेसले उनको हवाला दिँदै छोरा जन्मिएको उल्लेख गरेको छ ।

गर्भवती हुँदा काजलले आफ्नो मातृत्व यात्राबारे प्रशंसकहरूसँग लगातार अपडेट गरिरहेकी थिइन् । उनको अन्तिम पोस्ट उनको श्रीमान् गौतम किचलुलाई समर्पण थियो ।

उनले, ‘यति निस्स्वार्थ भएकोमा धन्यवाद, मेरो गर्भावस्था बेला लगभग हरेक रात मसँग उठ्नुभएकोमा, मसँग हप्तासम्म सोफामा क्याम्पिङ गरेकोमा किनकि त्यो मेरो लागि सुत्ने सबैभन्दा सहज ठाउँ थियो । कहिल्यै केहीमा नहिचकिचाई मलाई राम्रो महसुस गराउनुभएकोमा, मेरो हेरचाह गरेकोमा र अन्तमा सबै कुरामा मलाई माया गरेकोमा ।’

काजल अग्रवाल प्रख्यात तमिल र तेलुगु अभिनेत्री हुन् । उनले सन् २००४ मा ‘क्यू !हो गया ना’ चलचित्रबाट बलिउडमा डेब्यू गरेकी थिइन् । उनले पछि अजय देवगनको सह-अभिनेता भएर ‘सिंघम’, अक्षय कुमारसँग ‘स्पेशल २६’ र ‘दो लफ्जों की कहानी’ जस्ता हिन्दी फिल्महरूमा अभिनय गरिन् ।

अब ‘आचार्य’, ‘पेरिस पेरिस’ र कमल हसनको ‘इन्डियन २’ मा उनी देखिने छिन् ।