यातायात कार्यालयको फेसबुक पेजबाट ‘केजीएफ’ को प्रचार !

काठमाडौं । १४ हजार भन्दा बढी फलोअर्स रहेको गण्डकी प्रदेश नवलपुर यातायात व्यवस्था कार्यालय कावासोतीको आधिकारीक फेसबुक पेजबाट भारतीय चलचित्र केजीएफको प्रचार सामाग्री अपलोड गरिएको छ ।

शनिवार साँझ उक्त पेजबाट ‘केजीएफ च्याप्टर टु’ को प्रचार सामाग्री अपलोड भएको थियो । तर अपलोड भएको केही समयमै उक्त सामाग्री हटाइएको छ ।

उक्त पेजबाट सवारी चालक अनुमति पत्रका लागि लिखित परीक्षा मिति, परीक्षाको नतिजा, ट्रायल मिति लगायतका सूचना प्रवाह गर्नका निमित्त प्रयोग हुँदै आएको थियो ।

यातायात व्यवस्था कार्यालयले भने अहिले यो पेज आफ्नो नियन्त्रणमा नरहेको जनाएको छ । सोही पेजमा आफ्नो नियन्त्रणभन्दा बाहिर गएको पोस्ट शेयर भएको छ । साथै उक्त पेजलाई रिपोर्ट गरिदिन आग्रह समेत गरिएको छ ।

केही दिन अगाडिबाटै फेसबुक पेज नियन्त्रणमा नरहेपछि यातायात व्यवस्था कार्यालय नवलपुर कावासोतीले नयाँ फेसबुक पेज बनाएर सूचना प्रवाह गरिरहेको छ ।