भरतपुरमा महामन्त्री शर्माको तेस्रो विकल्प- गठबन्धन वा मित्रवत् प्रतिस्पर्धा जे भए पनि मेयर कांग्रेसको (भिडिओ)

काठमाडौं । नेपाली कांग्रेसका महामन्त्री विश्वप्रकाश शर्माले भरतपुर महानगरपालिकाको मेयरमा नयाँ प्रस्ताव अघि सारेका छन् ।

केन्द्रीय कार्य सम्पादन समितिको शनिवारको बैठकमा उनले गठबन्धन हुँदा कांग्रेसले नै लिने र नभए मित्रवत् प्रतिस्पर्धा गरेर जित्ने प्रस्ताव राखेका हुन् ।

भरतपुरमा नयाँ र तेस्रो विकल्पमा जाऔँ भन्दै शर्माले त्यो भनेको दुवैले नछाड्ने र मित्रवत् प्रतिस्पर्धा गर्ने रहेको बताए ।

शर्माको भनाइ थियो– ०७४ मा कांग्रेसले मेयरमा माओवादीलाई छोडेको थियो । माओवादी चाहन्छ यो पटक पनि कांग्रेसले सघाउनु पर्छ । हामी चाहन्छौँ यो पटक माओवादीले कांग्रेसलाई छोड्नु पर्छ । त्यही स्थानीय स्थिति, स्थानीय भावना र स्थानीय आवश्यकताले भन्छ भरतपुरको मेयर कांग्रेसको बन्नुपर्छ, तालमेल भए तालमेलबाट नभए मित्रवत् प्रतिस्पर्धा जिन्दाबाद ।

शर्माले आफू व्यक्तिगत रूपमा कांग्रेस एक्लै चुनाव लड्नुपर्ने पक्षमा रहेको समेत बताएका थिए ।

उनको भनाइ थियो– नितान्त व्यक्तिगत रूपमा भन्नुपर्दा मेरो दृष्टिकोण देशभर एक्लै लड्नुपर्छ भन्ने हो तिर निजात्मक बुझाई, भावनात्मक आवेग र धरातलीय यथार्थ बीच जो फरक हुन्छ, त्यही गाम्भिर्यताले तालमेलको तर्कमा म सुरुमै सहमत भएको हुँ । हाम्रो निर्णय गठबन्धन होइन,तालमेल मात्र हो, त्यो पनि स्थानीय स्थिति र आवश्यकता अनुरूप मात्र ।