जन्मदिनमा माग्नेबुढालाई दिपाश्रीको उपहार : हर्लिक्स र ललीपप (तस्बिर/भिडियो)

काठमाडौं । चर्चित हास्य कलाकार केदारप्रसाद घिमिरे उर्फ माग्ने बुढाले आज ४७ औ जन्मोत्सव मनाएका छन् । रेडियो अडिओले उनको जन्मदिन विशेष कार्यक्रम आयोजना गरेको थियो ।

समारोहमा वरिष्ठ हास्य कलाकार मदनकृष्ण श्रेष्ठ उपस्थित थिए । यस्तै, हास्यकलाकारहरु सन्दीप क्षेत्री, जितु नेपाल मुन्द्रे, दिपाश्री निरौला, मनोज गजुरेल लगायतको सहभागिता थियो ।

समारोहमा सहभागी कलाकारहरूले माग्ने बुढालाई सुस्वास्थ्य दीर्घायु तथा सफल कलाकारिता जीवनको लागि शुभकामना व्यक्त गरे । हास्य कलाकार तथा निर्देशक दिपाश्री निरौलाले भने अनपेक्षित उपहारसमेत दिइन् । समारोहमा केही ढिला गरी पुगेकी दिपाले माग्ने बुढालाई हर्लिक्स, सुगर फ्री बिस्कुट र ललिपप उपहार दिएकी हुन् ।

दिपाले अहिले माग्ने बुढा एकदमै दुब्लाएका कारण हर्लिक्स उपहार ल्याइदिएको बताइन् । जन्मेको दिन केही मिठो खानु पर्ने भन्दै उनले आफ्नै हातले माग्नेबुढालाई ललिपप खुवाइदिएकी थिइन् ।

‘माग्नु अहिले धेरै नै व्यस्त छ । अहिले वास्तवमा भेट हुनै गाह्रो भएको छ त्यही भएर मैले यो बिस्कुट, हर्लिक्स, ललिपपहरू किन ल्याइदिएको भने एकदम तन्दुरुस्त भएर भाइ र हाम्रो भेट भइराखोस् भनेर । भाइ एकदमै खान छोडेर पेट धप्कार बसिरहेको छ,’ उनले भनिन् । साथै उनले माग्ने बुढालाई एक फोटोसमेत उपहार दिएकी छिन् ।

तस्बिर भिडिओ : उमेश कार्की