‘हाम्रो शान, हाम्रो मान पल शाह’ भन्दै तनहुँमा समर्थकको र्‍याली

काठमाडौं । बलात्कार अभियोगमा प्रहरी हिरासतमा रहेका नायक पल शाहको पक्षमा तनहुँमा प्रदर्शन गरिएको छ । पलको समर्थनमा विभिन्न नारा लेखिएका प्लेकार्डसहित समर्थकले प्रदर्शन गरेका हुन् ।

करिब एक दर्जन युवा-युवतीले ‘पल शाह जिन्दावाद’, ‘हाम्रो मान, हाम्रो शान पल शाह’ दिनदु:खीको हिरो पल शाह, जस्टिस फर पल शाहलगायत नारा लेखिएको प्ले कार्ड बोकेका थिए । उनीहरूले पल शाहमाथि अन्याय भएको सञ्चारकर्मीसँग बताए ।

एक युवतीले भनिन्, ‘यदि बलात्कार भएको भए पीडितको लुगा च्यातचुत भएको हुनुपर्थ्यो । त्यो प्रमाणहरू खोई पुलिसमा दिएको ? एक वर्षपछि केस दिनु भनेको सरासर फसाइएको हो । दादा निर्दोष हुनुहुन्छ ।’

एक युवाले पल शाहले न्याय पाउनुपर्ने बताए ।

उनले भने, ‘समीक्षालाई जबर्जस्ती गरिएको भए आजभन्दा एक वर्षअगाडि यो कुरा किन आएन । जबर्जस्ती गरेर कसैको माया पाइन्छ ? पल शाहलाई न्याय दिनुपर्छ ।’

अर्का युवकले पल शाहको समीक्षाजस्ता हजारौं लाखौं फ्यान भएको दाबी गरे ।

उनले भने, ‘कुनै पनि पल शाहको डाइ हार्ड फ्यानले उहाँको कारणले मर्दैछु भनेर सुसाइड गर्यो भने त्यसमा पनि पल शाहलाई दोषी मान्ने त ? अडिओ क्लिप्सहरू आइसकेपछि अपराधी स्वयम्ले म अपराधी हो भनेर चारजनाको नाम लिनुभयो । त्यो चारजनालाई खोइ अनुसन्धानका लागि लगेको ? दुर्गेशले कार्यक्रममा जहाँ पनि हिँड्न पाउने ? नारीले आफ्नो यौवनलाई ब्रम्हास्त्र बनाएर पुरुषलाई प्रहार नगरोस । समीक्षा बहिनी तिमी पनि गलत छौ ।’

नायक पल शाहले हिजो तनहुँ जिल्ला प्रहरी कार्यालयमा पुगेर आत्मसमर्पण गरेका थिए । जिल्ला अदालत तनहुँले उनको सात दिन म्याद थप गरेको छ ।