फिल्म साउथ एसियामा छानिए ९ नेपाली फिल्म, अप्रिल २१-२४ सम्म फेस्टिभल काठमाडौंमा हुँदै

काठमाडौं । फिल्म साउथ एसियाको १३ औं संस्करण आगामी अप्रिल २१ देखि २४ अप्रिलसम्म काठमाडौंमा आयोजना हुने भएको छ ।

५५ वटाले मुख्य र विद्यार्थी खण्डमा ९ फिल्मले प्रतिस्पर्धा गर्ने शनिबार सार्वजनिक लाइनअपमा उल्लेख छ । प्राप्त तीनहजार आवेदन मध्येबाट ती फिल्म छनौट गरिएको जनाइएको छ ।

नेपालबाट ८ फिल्म मुख्य विधामा छानिएका छन् । जसमा ग्रीष्मा गिरी निर्देशित ‘ब्लूज अफ पिंक’, गणेश पाण्डे निर्देशित ‘को-हजबेन्ड’, सिकुमा राई निर्देशित ‘कम ओभर फर अ ड्रींक कान्छी’, विष्णु कल्पित निर्देशित ‘गड्ज बफेलो’, विशाल रोका मगरको ‘गोर्खा गर्ल’ छानिएका छन् ।

साथै, विभूषण बस्नेत र पूजा गुरुङ निर्देशित ‘द बिग हेडेड ब्वाइ, सामन्स एन्ड सामुरिज’, अनिल बुढा मगरको ‘द आइरन डिगर’, प्रणय लिम्बुको ‘उर्मी’ छनौट भएका छन् ।

विद्यार्थी खण्डतर्फ प्रदीप ढकालको ‘गाइने’ छानिएको छ ।