मिस वर्ल्डको अन्तिम १२ को लागि प्रतिस्पर्धा गर्दै नम्रता, डिजिटल मिडिया च्यालेन्ज आजदेखि

काठमाडौं । विश्व सुन्दरी प्रतियोगिता (मिस वर्ल्ड)को अन्तिम १२ मा प्रवेश गर्न सुन्दरीबीच प्रतिस्पर्धा सुरु भएको छ । यो प्रतिस्पर्धामा मिस नेपाल नम्रता श्रेष्ठ पनि सहभागि छिन् ।

मिस वर्ल्डले बिहिवार विज्ञप्ति जारी गर्दै मिस वर्ल्ड डिजिटल मिडिया च्यालेन्ज सुरु भएको जनाएको छ । यो विधामा उत्कृष्ट हुने सुन्दरीले सीधै अन्तिम १२ मा प्रवेश पाउनेछन् ।

नम्रतालाई जिताउन मिस वर्ल्डको वेबसाइटमा रहेको पेजलाई सेयर र पोस्ट गर्नुपर्ने हुन्छ । नम्रता यसअघि नै ७० औं विश्व वर्ल्ड प्रतियोगिताको हेड टु हेड च्यालेन्जमा विजेता बन्दै अन्तिम ३० मा प्रवेश गरिसकेकी छिन् ।

ब्यूटी अफ प्रपोज विधामा उनी उत्कृष्ट १० बनेकी छिन् भने मल्टिमिडिया विधामा उत्कृष्ट १० बनेकी छिन् । कोरोनाभाइरस महामारीको कारण यसअघि ग्रान्ड फिनाली स्थगित गरेको मिस वर्ल्डले ४० जना प्रतिस्पर्धीलाई फास्ट ट्रयाक विधिमार्फत छनौट गर्दै अमेरिका बोलाएको छ ।

फिनालीमा भाग लिन नम्रतासहितका ४० जना प्रतिस्पर्धी मार्च १२ मा अमेरिकी राज्य पुएर्तो रिकोमा पुग्नुपर्नेछ । मार्च १७ मा ग्रान्ड फिनाली हुनेछ । मार्च १७ मै ब्यूटी विथ प्रपोजको इभेन्ट हुनेछ भने मार्च १८ मा नम्रता स्वदेश फर्कनेछिन् ।