‘लप्पनछप्पन’ भर्सेस ‘ब्याटम्यान’ : नेपाली बक्सअफिसमा हेभिवेट भीडन्त तय

काठमाडौं । दुई प्रतीक्षित फिल्महरु ‘लप्पन छप्पन २’ र हलिउड सुपरहिरो फिल्म ‘द ब्याटम्यान’बीच नेपाली बक्सअफिसमा प्रतिस्पर्धा हुने भएको छ ।

हलिउड स्टुडियो वार्नर ब्रोजको नेपाल वितरण अधिकार लिएपछि पहिलोपटक एप्पल इन्टरटेनमेन्टले ‘ब्याटम्यान’ फिल्मलाई रिलिज गर्न लागेको हो ।

एप्पलले सूचना जारी गर्दै रोबर्ट प्याटिन्सन स्टारर फिल्मलाई फागुन १९ मा रिलिज गर्ने जनाएको छ । उक्त दिन बिहिबार ग्याल्पो ल्होसारको सार्वजनिक बिदा समेत छ ।

सौगात मल्ल स्टारर ‘लप्पन छप्पन २’ले चाहिँ फागुन २० लाई प्रदर्शन मिति घोषणा गरिसकेको छ । यद्यपी, यो फिल्म बिहिबार नै प्रि-पोन्ड हुने सम्भावना रहेको बताइन्छ ।

ब्याटम्यान र लप्पन छप्पन २ दुबै एक्सन जानराका फिल्म भएकाले यो विधा रुचाउने दर्शकलाई प्रिय लाग्न सक्ने अनुमान गर्न सकिन्छ । बुधबार रिलिज भएको लप्पन छप्पन २ ट्रेलरले सामाजिक संजालमा राम्रो प्रतिक्रिया पनि बटुलेको छ ।