विद्युत नियमन आयोगका पदाधिकारी हटाउन छानबिन समिति गठन, तीनजना स्वतः निलम्बन

काठमाडौं । सरकारले विद्युत नियमन आयोगका पदाधिकारीहरूलाई निलम्बन गरेको छ । बर्खास्त गर्दा अदालतबाट पुनर्वहाली भएर आउने देखिएपछि कार्य सम्पादन क्षमता नदेखिएको भन्दै छानबिन समिति गठन गरेर स्वतः निलम्बनमा राखेको हो ।

मन्त्रिपरिषदको अघिल्लो बैठकबाटै छानबिन समिति गठन भएको सरकारका प्रवक्ता ज्ञानेन्द्रबहादुर कार्कीले बताए । विद्युत नियमन आयोगका अध्यक्ष डिल्लीबहादुर सिंह र सदस्य रामेश्वर कलवार तथा भागिरथी ज्ञवालीमाथि छानबिन समिति गठन भएको हो ।

पुनरावेदन अदालतका पूर्वमुख्यन्यायाधीश प्रकाशचन्द्र गजुरेलको अध्यक्षतामा छानबिन समिति गठन भएको छ । ऊर्जामन्त्री पम्फा भुसालको प्रस्तावमा सरकारले छानविन समिति गठन गरेको बताइएको छ ।

केपी ओली नेतृत्वको सरकारले उनीहरूलाई २०७६ वैशाखमा नियुक्त गरेको थियो । आयोगका सदस्य रामप्रसाद धितालले भने यसअघि नै राजीनामा दिएका थिए ।