फ्राइडे रिलिज : ट्रान्सजेन्डर रोमान्सदेखि १६ वर्षमाथिका दर्शकले मात्र हेर्न पाउने फिल्मसम्म

काठमाडौं । शुक्रबार नेपाली हलहरुमा दुईवटा नयाँ फिल्म रिलिज भएका छन् । बलिउडको ‘चन्डीगढ करे आशिकी ‘र नेपालको ‘सकिन भुल्न तिमीलाई’ प्रदर्शनमा आएका हुन् । अभिषेक कपुर निर्देशित हिन्दी रोमान्टिक फिल्म ‘चन्डीगढ करे आशिकी’मा आयुष्मान खुराना र वाणी कपुरको मुख्य भूमिका छ । ११७ मिनेट लामो यो फिल्मलाई समीक्षकले रुचाएका छन् ।

हिन्दी मेनस्ट्रिम फिल्ममा ट्रान्सजेन्डर पात्र र उनीहरुको रोमान्सलाई लिएर फिल्म कमै बनाइन्छ । सामाजिक मुद्दाकै रुपमा रहेको यो फिल्मले गम्भिर सन्देश पनि प्रवाह गर्न खोजेको छ । आयुष्मान खुरानाका फिल्म रुचाउने दर्शकलाई यो फिल्म रुचीकर हुनसक्छ । ट्रान्सजेन्डर पात्रको रोमान्सलाई समेटिएको यो फिल्मलाई पारिवारिक दर्शकभन्दा पनि बौद्धिक दर्शकले समेत रुचाउन सक्छन् ।

यसैबीच, नेपाली फिल्म ‘सकिन भुल्न तिमीलाई’ मुलुकका २० वटा हलबाट शुक्रबारदेखि प्रदर्शनमा आएको छ ।

राज बस्न्यात को निर्माण निर्देशनमा तयार भुल्न सकिन तिमीलाई एडल्ट फिल्म हो । १६ बर्ष भन्दा माथिका दर्शकलाई हेर्न मिल्ने गरी सेन्सर बोर्डले यो फिल्मलाई आर रेटेड प्रमाणपत्र दिएको हो । निर्माण भएको लामो समयको प्रतिक्षामा यो चलचित्र हलमा रिलिज भएको हो । फिल्ममा सुशान्त कार्की र पनाह अधिकारीको मुख्य भूमिका छ । पटकथालाई नायिका समेत रहेकी पनाह अधिकारीले लेखेकी हुन् । युवा पुस्ताको प्रेम रोमान्स अनि वियोगलाई फिल्ममा चित्रण गरिएको छ ।