‘आरआरआर’ ट्रेलर लन्च : ‘बाहुबली’ निर्देशकको नयाँ फिल्मले नेपालमा छाप्ला पैसा ?

काठमाडौं । ‘बाहुबली’ फेम्ड एसएस राजामौली निर्देशित आगामी प्रतीक्षित फिल्म ‘आरआरआर’को ट्रेलर लन्च भएको छ ।

जुनियर एनटीआर, अजय देवगण, राम चरण, आलिया भाट स्टारर फिल्मको ट्रेलरमा भरपुर एक्सन समावेश छ । यो पिरियोडिक ड्रामामा सबै कलाकार एक्सन अवतारमा प्रस्तुत छन् ।

आकर्षक थलो, छायांकन र केही भारतीय देशभक्ति दृश्यलाई जोडदार रुपमा चित्रण गरिएको छ । मुम्बइमा बिहीबार आयोजित पत्रकार सम्मेलनमा ट्रेलर लन्च गरिएको हो ।

अल्लुरी सीताराम राजु र कोमाराम भीमजस्ता दुईजना भारतीय क्रान्तिकारीको काल्पनिक कथामा फिल्म आधारित छ । क्रमशः राजुले बेलायती उपनिवेश र भीमले हैदराबादको निजाम आन्दोलनमा बहादुरी प्रस्तुत गरेका थिए ।

आरआरआर नेपाली दर्शकसामु समेत प्रतीक्षित फिल्म हो । निर्देशक राजामौलीका दुबै बाहुबली फिल्मले नेपाली बक्सअफिसमा समेत राम्रो व्यवसायिक कमाइ गरेका थिए ।

यो फिल्म सन् २०२२ को जनवरी ७ मा रिलिज हुँदैछ ।