अब गर्भवतीलाई पनि कोरोनाविरुद्धको खोप लगाइने

काठमाडौं । सरकारले गर्भवती भएको पहिलो तीन महिना पुगेका सबै गर्भवतीलाई कोरोनाभाइरसविरुद्धको खोप दिने भएको छ । स्वास्थ्य मन्त्रालयका अनुसार यसअघि संक्रमणको उच्च जोखिममा रहेका गर्भवती महिलाहरूले मात्र कोभिडविरुद्धको खोप लगाइरहेका थिए ।

चैत मसान्तसम्म लक्षित समूहमा खोप लगाइसक्ने लक्ष्य लिइएकाले सबैलाई स्वास्थ्य संस्थामा गएर सम्पर्क राख्न मन्त्रालयले आग्रह गरेको छ । गर्भवतीमा खोपको प्रभावकारिताबारे अस्पष्टताका कारण खोप लगाउनेको संख्या न्यून रहे पनि बिस्तारै बढ्दै गएको मन्त्रालयले जनाएको छ ।

स्वास्थ्य विभागअन्तर्गतको परिवार कल्याण महाशाखाले सूचना जारी गर्दै यस्तो जानकारी दिएको हो । सरकारले पुस मसान्तसम्म दुई तिहाइ र बैशाख मसान्तसम्म लक्षित जनसंख्यालाई कोभिडविरुद्धको खोप दिने लक्ष्य राखेको छ ।