टीकटक स्टार नेपाली रियालिटी सो हुँदै, निर्णायकमा गौरी, रमेशदेखि वर्षासम्म

काठमाडौं । नेपालमा पहिलोपटक टीकटक स्टार नेपाली रियालिटी सो २०७८ आयोजना हुने भएको छ । बुधबार राजधानीमा आयोजित पत्रकार सम्मेलनमा यसबारे जानकारी दिइयो ।

१० सेकेन्डदेखि ३ मिनेटसम्मको टीकटक भिडियो पेश गरेर प्रतिस्पर्धामा भाग लिन सकिने भएको छ । १० वर्षभन्दा माथिल्लो उमेरका र टीकटकमा खाता भएकाले भाग लिन पाउने भएका छन् ।

तीन विधामा हुने टीकटक रियालिटी सोमा कुनै जात, धर्म, लिंग र सम्प्रदायको अपमान हुने गरी भिडिओ बनाउन पाइनेछैन । जसमा राष्ट्र-राष्ट्रियता, मौलिक कला र संस्कृति तथा हाँस्य अभिनय र नृत्य विधामा रहेका छन् ।

नेपाली कला, संगीत र साहित्यको प्रवद्र्धन गर्ने उद्देश्यले आयोजित यो सोको निर्णायकमा कलाकारहरु गौरी मल्ल, रमेश उप्रेती र वर्षा शिवाकोटी छन् । पूर्वमिस नेपाल सुगरिका केसी होस्ट रहेकी छिन् ।

अनलाइनमार्फत आवेदन दिन सकिने जनाइएको छ । सोमा पहिलो हुनेलाई कार, दोस्रो हुनेलाई मोटरसाइकल, तृतीयलाई स्कुटर, चौंथोलाई क्यामेरा, पाँचौं हुनेलाई ल्यापटप, छैटौंलाई टिभी र उत्कृष्ट दशसम्म हुनेलाई मोबाइल पुरस्कार दिइने भएको छ ।

विजयी हुनेलाई फिल्म, सिरियल, म्युजिक भिडिओमा अवसर समेत दिइने जनाइएको छ । पत्रकार सम्मेलनमा श्रममन्त्री कृष्णकुमार श्रेष्ठ र चलचित्र विकास बोर्डका अध्यक्ष दयाराम दाहाल पनि उपस्थित थिए ।