मिस नेपाल नम्रता श्रेष्ठले बनाइदिइन् धादिङमा झोलुंगे पुल, मिस वर्ल्डमा प्रोजेक्ट प्रस्तुत गर्ने

काठमाडौं । मिस नेपाल नम्रता श्रेष्ठको पहलमा धादिङको नीलकण्ठ नगरपालिकास्थित खोलामा झोलुंगे पुल निर्माण भएको छ ।

७३ मिटर लम्बाइको उक्त पुलको मंगलबार मिस नेपाल श्रेष्ठसहित हिडन ट्रेजरका अध्यक्ष दिवाकर राजकर्णिकार र नगरपालिकाका मेयर भीम ढुंगानाले संयुक्तरुपमा उद्घाटन गरे ।

५० लाख लागतमा निर्माण भएको उक्त पुल मिस वर्ल्डको आगामी संस्करणअन्तर्गत ब्यूटी विथ पर्पस प्रोजेक्टका लागि बनाइएको हो । उक्त पुलबाट धादिङका फिरिंगे, सोह्रघरे र आशबारा गाउँका १२ हजार बासिन्दा लाभान्वित हुनेछन् ।

‘४ महीनाको प्रयासपछि पुल निर्माण भएको छ’ मिस नेपाल श्रेष्ठले नेपाल प्रेसलाई भनिन्, ‘यो प्रोजेक्टले अब हामीलाई मिस वर्ल्डको लागि अझै लक्षित भएर अघि बढ्न सजिलो भएको छ ।’

आगामी डिसेम्बर १६ मा अमेरिकाको पुएर्तो रिकोमा मिस वर्ल्ड आयोजना हुँदैछ र नम्रताले नेपालको तर्फबाट भाग लिँदैछिन् । विश्व सुन्दरी प्रतियोगिताको महत्वपूर्ण विधा ब्यूटी विथ पर्पसमा नेपाल दाबेदारको रुपमा रहँदै आएको छ ।

मिस वर्ल्डका लागि नम्रताले तयारी गरिरहेकी छिन् ।