अबदेखि नेपाल भाषाको फिल्म नियमित रिलिज हुने, आज ‘वसन्तऋतु’ रिलिज

काठमाडौं । कीर्तिपुरमा यसैसातादेखि संचालनमा आएको फिल्म हल कीर्तिपुर सिनेप्लेक्सले नियमितरुपमा नेवारी फिल्म प्रदर्शन गर्ने भएको छ । बुधबार नेपाल भाषाको फिल्म ‘वसन्त ऋतु’ रिलिज भएको छ ।

गतसाता रिलिज भएको नेवारी भाषाको फिल्म ‘हिसिमती’ले सन्तोषजनक प्रदर्शन गरेको छ । साप्ताहिकरुपमै नेपाल भाषाको फिल्मलाई प्रदर्शन गर्ने आफूहरुको योजना रहेको हल संचालक तथा निर्माता नरेन्द्र महर्जनले नेपाल प्रेसलाई बताए ।

मुलुकमा पहिलोपटक नियमितरुपमा नेपाल भाषाको फिल्म प्रदर्शन थालिएको हो । यसअघि च्यारिटी र महोत्सवको बेलामा मात्र नेवारी फिल्म देखाइन्थ्यो । ‘कीर्तिपुर नेवारहरुको घनावस्ती पनि भएकाले नेपाल भाषाको फिल्मलाई देखाउन थालेका हौं’ महर्जनले भने ।

‘हिसिमती’कोे प्रदर्शनबाट प्राप्त प्रतिक्रिया र व्यापारले आफूहरुलाई थप हौसला थपेको संचालक महर्जनले बताए । अहिले समय र सोज व्यवस्थापन गरेर कीर्तिपुर सिनेप्लेक्सले अन्य भाषा र नेपाल भाषाका फिल्मलाई प्रदर्शन गरिरहेको छ ।