पाँच महीना ‘मुन्द्रेको कमेडी क्लब’ बन्द हुने, नयाँ कमेडी सिरिज ल्याउँदै जितु नेपाल

काठमाडौं । जितु नेपालले संचालन गर्ने टेलिभिजन सो ‘मुन्द्रेको कमेडी क्लब’ पाँच महीना बन्द हुने भएको छ ।

नेपाल प्रेससँग कुरा गर्दै अभिनेता नेपालले नयाँ टीम र ढाँचासहित पुनः सो ल्याउने सोच भएकाले केही महीना विश्राम लिइने बताए ।

मंसिरदेखि छायांकन सुरु हुने फिल्म र जितुकै निर्देशनमा आउन लागेको टेलिसिरियलमा व्यस्त हुनुपर्ने भएकाले मुन्द्रेको कमेडी क्लबलाई ब्रेक गर्न लागिएको उनले जनाए ।

मंसिरदेखि सुरु हुने फिल्ममा जितु र साम्राज्ञी शाहको मुख्य भूमिका हुनेछ भने कपिल रिजालले यसलाई निर्देशन गर्नेछन् । त्यसपछि जितु समसामयिक राजनीतिक कथावस्तुमा आधारित टिभी सिरिजमा व्यस्त हुनेछन् ।

‘यी दुई काम सकिएपछि पुनः मुन्द्रेको कमेडी क्लब नयाँ टीम र ढाँचासहित आउनेछ’ उनले भने । ‘पुरानै ढाँचा सो चलाउन थालेको पनि डेढ वर्ष भैसकेको थियो’ उनले भने, ‘अब यसलाई चेन्ज गरौं न भन्ने सोचमा छौं ।’

तर, नयाँ टीम भनेको के हो भन्नेबारे भने उनले खुलाएनन् ।