रास्वपा सरकारमा जान सकारात्मक, प्रवक्ता ढकाल भन्छन् – प्रधानमन्त्रीले साविकको मन्त्रालय दिन्छु भनिसक्नुभयो

काठमाडौं । राष्ट्रिय स्वतन्त्र पार्टी सरकारमा जान सरकारात्मक देखिएको छ। तर, सरकारमा जाने वा नजाने भन्ने बिषयमा शुक्रबार निर्णय हुने प्रवक्ता मुकुल ढकालले बताए।

पार्टीको केन्द्रीय समितिको बैठकपछि उनले भने, ‘आजको बैठकमा सबैले सरकारमा जाँदा र नजाँदाको फाइदा र बेफाइदाबारे छलफल गरेका छौं। अब शुक्रबार सबैले आआफ्नो धारणा राख्नुहुन्छ।’

पार्टीको आगामी भविष्यलाई हेरेर निर्णय गर्ने बताए। प्रधानमन्त्री पुष्पकमल दाहाल प्रचण्डले पार्टी सभापति रवि लामिछानेसँगको भेटमा साविकको मन्त्रालय र सरकारको न्यूनतम साझा कार्यक्रम संशोधन गर्न तयार भएको बताएको उनको भनाइ छ।

पार्टी सरकारमा गएको खण्डमा स्वणिम वाग्लेलाई अर्थ मन्त्रालयमा पठाउने आफूहरु तयार रहेको बताए। पार्टी सरकारमा जाने भए अर्थ मन्त्रालयको दाबी गर्नुपर्ने कतिपय नेताहरुले भनाइ राखेको उनको भनाइ छ।

आफूहरुले अहिलेसम्म कुनै गठबन्धनमा नभएको प्रष्ट पार्दै एजेण्डाको आधारमा सबैसँग सहकार्य हुनसक्ने बताए।