भण्डारीमाथि राष्ट्रियसभा उपाध्यक्षकाे आराेप- एमालेकाे मात्रै राष्ट्रपति हुनुभयाे (भिडिओ)

काठमाडौं । राष्ट्रियसभा उपाध्यक्ष उर्मिला अर्यालले राष्ट्रपति विद्यादेवी भण्डारी नेकपा एमाले पार्टीको मात्रै राष्ट्रपति भएको आरोप लगाएकी छन् । बिहीबार सिंहदरबारस्थित आफ्नो कार्यकक्षमा संसदीय रिपोर्टिङ गर्ने पत्रकारहरुसँगको कुराकानीमा उनले यस्तो आरोप लगाएका हुन् ।

उनले नेकपा एमालेले जुनसुकै विधेयक लगे पनि पास गर्ने तर अन्य पार्टीहरुले लगेको विधेयक पास नगर्ने गतिविधिहरुका कारण राष्ट्रपति एमालेको मात्रै भएको बताइन् । उनले नागरिकता विधेयक राष्ट्रपतिले संसदबाट दुई पटक पास गरेर लैजाँदासमेत फर्काउनु गलत भएको दाबी गरिन् ।

दुई पटक लैजाँदासमेत विधेयक पास नगर्नु पीडादायी रहेको अर्यालले उल्लेख गरिन् ।

उपाध्यक्ष अर्यालले भण्डारीले राष्ट्रपति जस्तो पदमा बसेर अरुको इसारामा नागरिकता विधेयक रोकेको दाबी गरिन् । उनले राष्ट्रपति भइसकेपछि सबै पार्टीलाई अभिभावकत्वको हिसाबले हेर्नुपर्ने बताइन् ।

उनले भनिन्, ‘ राष्ट्रपति भइसकेपछि राष्ट्रको अभिभावकको हैसियतले पार्टीको स्तरभन्दा माथि उठेर छलफल गर्नुपर्छ । नागरिकता विधयेक एक चोटी फर्काउनु ठीक छ । तर, दोस्रो पटक पठाएपछि पनि फर्काउनु भनेको संवैधानिक पदमा रहेको मान्छेले त्यस्तो गर्न मिल्छ र ? उहाँ सधैँ एमालेको मात्रै राष्ट्रपति भइराख्नुभयो । त्यहाँ जे सल्लाह हुन्छ त्यहीमात्रै गर्ने, एमालेले लगेको विधेयक ओके गर्ने कानून बनेर जाँदा रिजेक्ट गर्न मिल्छ र ? राष्ट्रपति भइसकेपछि सबै पार्टीलाई अभिभावकत्वको हिसाबले हेर्नुपर्छ । उहाँले कार्यकारी अधिकार नै प्रयोग गर्ने हिसाबले रिजेक्ट गर्न मिल्दैन ।’

उपाध्यक्ष अर्यालले संवैधानिक पदमा रहेका व्यक्तिहरुले पदको मर्यादा जोगाउन नसके अहिलेसम्मका आन्दोलनबाट प्राप्त उपलब्धिहरु गुम्ने खतरा रहेको बताइन् ।