एमालेको प्रतिक्रिया : प्रधानमन्त्रीबाट धोकाको राजनीति र अस्थिरताको विजारोपण भयो

काठमाडौं । सत्तारुढ दल नेकपा एमालेले आज बालुवाटारमा आठ दलको बैठकको निर्णयले देशमा नयाँ अस्थिरताको विजारोपण गरेको जनाएको छ । पार्टीका उपमहासचिव प्रदीप ज्ञवालीले सत्ता गठवन्धनको भविष्यसमेत अनिश्चित बनेको बताए ।

नेपाल प्रेससित कुरा गर्दै ज्ञवालीले गठवन्धनको सबैभन्दा बढी लाभ लिएका प्रधानमन्त्री प्रचण्डले नै गठवन्धनका सहयात्री दललाई धोका दिएको बताए ।

उनले भने, ‘उहाँको राजनीतिलाई धोकाधडी, दाउपेच र सौदावाजीको विषय बनाउनुभयो । अब हामीले नयाँ ढंगले सोच्नुपर्ने परिस्थिति निर्माण भएको छ ।’

अहिलेको राजनीतिक चक्रब्यूहको असर नेपाली राजनीतिमा दुरगामी पर्ने उनले बताए । सत्तारुढ गठबन्धनको भविष्य अनिश्चित बनेको समेत उनको भनाइ छ ।

विकसित घटनाक्रमबारे एमालेले भोलि सचिवालय बैठक बसेर आफ्नो धारणा बाहिर ल्याउने भएको छ ।