माओवादी स्थायी कमिटी बैठक बस्दै, राजनीतिक कोर्स परिवर्तनदेखि पार्टी एकीकरणसम्मका एजेण्डा

काठमाडौं । नेकपा माओवादी केन्द्रले स्थायी कमिटीको बैठक बोलाएको छ । पछिल्लो समसामयिक राजनीतिक घटनाक्रमको बारेमा छलफल गर्न माघ १२ गते बस्नेगरी स्थायी कमिटीको बैठक बोलाइएकोे महासचिव देव गुरुङले बताए ।

उनले नेपाल प्रेससँग भने, ‘बैठकमा अहिलेको परिस्थितीबारे रिपोटिङ हुन्छन्। अहिले जुन राजनीतिक परिवर्तन भइरहेका छन् ।’

पार्टी संगठन विकास र विस्तारको विषयमा पनि छलफल हुने उनले बताए । पार्टी एकीकरणको बिषयमा जोडिएका विषयमा पनि छलफल हुने उनको भनाइ छ ।

उनले भने, ‘केही दलहरुसँग एकीकरणको चर्चा भइरहेको छ । त्यसबारे छलफल गर्न र सम्भव÷असम्भव पनि स्थायी कमिटीमा निर्णय हुन्छ ।’

माओवादीले डा. बाबुराम भट्टराई नेतृत्वको नेपाल समाजवादी पार्टीसँग एकता गर्ने सहमति भइसकेको छ । यस्तै माधव नेपाल नेतृत्वको एकीकृत समाजवादीसँग एकताको चर्चा छ ।

त्यस्तै, कांग्रेस नेतृत्वको गठबन्धन छाडेर एमालेसँग प्रचण्ड प्रधानमन्त्री बनेपछि विभिन्न टिकाटिप्पणी भइरहेको छ ।

स्थायी कमिटीको बैठकले पार्टी केन्द्रीय समितीको बैठकको मिति तोक्ने उनले बताए ।