ओलीको प्रतिबद्धता- यो सरकार सफल बनाउन उपयुक्त गाइड गर्छौँ, राजनीतिक नेतृत्व लिन्छौँ
‘एमालेलाई थाङ्नामा सुताउन नसकेको कांग्रेसले अरूलाई अफर गर्न सक्छ, तर उसको प्रयास सफल हुन्न’
नेपाल प्रेस
२०७९ पुष २३ गते १४:२१
काठमाडौं । सत्ता गठबन्धनको सबैभन्दा ठूलो दल नेकपा एमालेका अध्यक्ष केपी शर्मा ओलीले प्रचण्ड नेतृत्वको सरकारलाई सफल बनाउने प्रतिबद्धता व्यक्त गरेका छन् । सांसदहरूको अभिमुखीकरण कार्यक्रममा अध्यक्ष ओलीले सफल सरकार बनाउन उपयुक्त ढंगले गाइड गर्ने बताए ।
ओलीले भने– हाम्रो कर्तव्य यो सरकारलाई सफल बनाउने हो । सफल सरकार बनाउँछौँ र त्यसका लागि उपयुक्त ढंगले गाइड गर्छौँ । यो सरकारले सही नीति लेओस्, भ्रष्टाचार नगरोस् र नहोस् । यसले सुशासन र विकासको लागि उचित र आवश्यक कदमहरू चालोस् ।
ओलीले पुस २६ गते सरकारले विश्वासको मत प्राप्त गर्ने र यो सरकारले विश्वासको मत पाएपछि कांग्रेस पाँचै वर्ष प्रतिपक्षमा रहेर विरोध गर्ने बताए । कांग्रेसले विगतमा जस्तै फेरि पनि च्याँखे थाप्न सक्ने भन्दै ओलीले विभिन्न दलका नेतालाई प्रधानमन्त्रीको अफर गर्नुको संवैधानिक औचित्य नै नरहेको बताए ।
राप्रपालाई कांग्रेसले प्रधानमन्त्री अफर गरेको हल्लका सन्दर्भमा ओलीले भने–राजनीति बुझ्नेले यो संविधानको कुनै धारामा सम्भव छैन भन्ने बुझेका छन् । हामीलाई त थाङ्नामा सुताउन खोज्ने कांग्रेसले अरूलाई नगर्ला भन्न सकिन्न । हामीलाई नै अस्ति ५ बजेसम्म पर्खाएर धारा ७६ (३) को सरकार बनाउन खोज्दै थियो,हामीले असफल बनाएको हो ।
ओलीले यो सरकार र संसद्लाई सफल बनाउने एमालेले राजनीतिक नेतृत्व गर्ने बताए ।
नेपाल प्रेस
प्रकाशित: २०७९ पुष २३ गते १४:२१
प्रतिक्रिया
सम्बन्धित खवर
