नेसपाले बैठक बोलायो, माओवादीसँगको एकताबारे पनि छलफल हुने

काठमाडौं । नेपाल समाजवादी पार्टीले राजनीतिक समितिको बैठक बोलाएको छ । पुस २४ गते बस्ने गरी बैठक बोलाएको पार्टीका प्रचार विभाग प्रमुख विश्वदीप पाण्डेले बताए ।

बैठकमा पार्टीको आगामी यात्रा, माओवादीसँगको एकता र समसामयिक राजनीति विषयमा छलफल हुने बताए।

डा. बाबुराम भट्टराई नेतृत्वको नेसपा मंसिर ४ मा भएको प्रतिनिधि र प्रदेशसभाको निर्वाचनमा नेकपा माओवादी केन्द्रको चुनाव चिन्ह लिएर गएको छ ।

१० वर्षे जनयुद्धका सहयात्री प्रचण्ड र बाबुराम अहिले नजिक भएका छन् । प्रधानमन्त्रीसमेत रहेका प्रचण्डसँग सोमबार अध्यक्ष भट्टराईले भेटवार्ता गरेका थिए । नेसपाका अधिकांश नेताहरूले अब माओवादीसँग एकता गर्नुपर्नेमा जोड दिएका छन् ।