भोजपुरमा वडाध्यक्षले वृद्ध कुटे, प्रहरीद्वारा जाहेरी लिन इन्कार

भोजपुर । भोजपुरमा वडाअध्यक्षको कुटाइबाट एक वृद्ध घाइते भएका छन् । भोजपुर नगरपालिका-१ का वडाध्यक्ष जिरामणि राईले ६२ वर्षीय लोकबहादुर राईलाई कुटेका हुन् । जिरामणि माओवादी केन्द्रबाट निर्वाचित भएका हुन् ।

भोजपुर-१ डाँडाबोखिमको मिलडाँडामा छोरा सुगेन राईले लगेको २० हजार नतिरेको भन्दै जिरामणि दम्पतीले लोकबहादुरलाई कुटपिट गरेका हुन् । वडाध्यक्ष राई र श्रीमती वृन्दा राई मिलेर कुटेको लोकबहादुरका भाई मच्छिन्द्र राईले बताए । लोकबहादुरले आफूलाई ज्यान मार्ने धम्की दिएको बताए ।

लोकबहादुरको देब्रेपट्टिको कानको जालीमा असर परेको र टाउकोको चोटबाट रगत बगेको पारिवारिक स्रोतले बताए ।

शनिबार भोजपुर अस्पताल ल्याइएकोमा उनको अवस्था गम्भिर भएको भन्दै चिकित्सकले सुविधासम्पन्न ठाउँमा लैजान भन्दै लोकबहादुरलाई रिफर गरिएको छ ।

जिल्ला प्रहरी कार्यालय, भोजपुरले चुनावपछि आउनु भन्दै जाहेरी लिन नमानेको पीडितले बताए । राजनीतिक दबाबमा परेर प्रहरीले दोषी उम्काउने प्रयास गरेको आरोप उनीहरूको छ ।

प्रहरी प्रमुख डीएसपी सरोज घिमिरेले कुटपिटको विषयमा अनुसन्धान भइरहेको र दुई पक्षलाई राखेर कानूनी कारबाही अघि बढाइने बताए ।