राप्रपाको आमसभामा ‘कम्युनिष्ट गीत’ घन्किएपछि…(भिडिओ)

काठमाडौं । पञ्चायतविरोधी संघर्षका क्रममा कम्युनिष्ट कार्यकर्ताहरुबीच अत्यधिक लोकप्रिय बनेको गीत हो- गाउँ-गाउँबाट उठ बस्ति बस्तिबाट उठ.. । प्रगतिशील श्याम तमटको सिर्जना एवम् रामेश र रायनद्वारा गाइएको यो क्रान्तिकारी गीतलाई नेपालको ‘कम्युनिष्ट गान’ भन्दा फरक पर्दैन । पछि चलचित्र ‘बलिदान’ मा समेत यो गीत समावेश गरिएको थियो ।

पञ्चायती व्यवस्थाको विरोधमा जनतालाई जागरुक गराउन रचिएको यही चर्चित गीत आज पूर्वपञ्चहरुको पार्टी राप्रपाको आमसभामा गाइएको छ ।

बसन्तपुरमा भएको पार्टीको चुनावीसभामा एक महिला कलाकारले ¥याप शैलीमा गिटार बजाउँदै ‘गाउँ-गाउँबाट उठ’ गीत गाएकी हुन् । आमसभामा उपस्थित राप्रपा कार्यकर्ताहरुले ताली बजाउँदै उनलाई साथ दिए ।

उनले ‘रातो र चन्द्र सुर्य..’, ‘रेशम फिरीरी’ लगायत गीत पनि गाइन् । रेशम फिरीरी गाउँदा राप्रपाका नेताहरु मञ्चमै छमछमी नाचेका थिए ।

राप्रपाको आमसभामा अभिनेत्री मनिषा कोइराला पनि सहभागी हुने भनिएको छ । यो समाचार लेख्दासम्म उनी कार्यक्रमस्थलमा आइपुगेकी छैनन् ।