पश्चिमनवलपरासीमा बागीलाई भोट हाल्न माओवादीको सर्कुलर

रुपन्देही । नेकपा माओवादी केन्द्र पश्चिमनवलपरासीमा गठबन्धनका आधिकारिक उम्मेदारविरुद्ध बागी उम्मेदारलाई मत दिन आग्रह गरेको पत्र सार्वजनिक भएसँगै विवाद सुरू भएको छ ।

निर्वाचन क्षेत्र २ को १ मा स्वतन्त्र उम्मेदार दिएका खडक बस्नेतलाई समर्थन गर्ने निर्णयसहित क्षेत्र नं १ (१) का अध्यक्ष हरि भण्डारीले विज्ञप्ती निकालेपछि आन्तरिक विवाद बाहिरिएको हो । भण्डारीले स्वतन्त्र उम्मेदारी दिएका बस्नेतको चुनाव चिन्ह पानीको धारामा मतदान गर्न पार्टी पंक्तिलाई आव्हान गरेका छन् ।

यो क्षेत्रमा सत्तागठबन्धनबाट माओवादीबाट चिनक कुर्मी साझा उम्मेदवार छन् । प्रचण्डको दबाबमा बाबुराम भट्टराईनिकट कुर्मीलाई टिकट दिएपछि पुराना नेता खडकसहितको समूह आक्रोशित बनेको छ । मनोनयनको बेला माओवादीबाटै उम्मेदवारी दर्ता गर्न खोजेका बस्नेतलाई नेतृत्ले रोकेपछि उनले स्वतन्त्रबाट उम्मेदवारी दिएका थिए ।

माओवादीबाट विद्रोह गरेका उनलाई कांग्रेसका असन्तुष्ट टीमको पनि बलियो साथ छ । यहाँ एमालेले थानप्रसाद गैरेलाई अघि सारेको छ ।

पार्टीका आधिकारिक उम्मेदारविरुद्ध क्षेत्रीय अध्यक्षले विज्ञप्ती नै निकालेपछि यहाँको जिल्ला नेतृत्वले उनलाई सम्झाउन बोलाएको छ ।

‘उहाँले विज्ञप्ति निकालेपछि हाम्रो सम्पर्क भयो, उहाँले समर्थक साथीहरुको दबाबमा गरेर गल्ती भयो सच्चाउँछु भन्नुभएको छ, विवाद समाधान हुन्छ’, माओवादी नेता गोपी ज्ञवालीले नेपाल प्रेससँग भने ।