प्रतिस्पर्धाविहीन गोरखामा असाधारण मत संख्याले उम्मेदवार जिताएर पुष्टि गर्नुछ: नारायणकाजी श्रेष्ठ

काठमाडौं । नेकपा माओवादी केन्द्रका नेता नारायणकाजी श्रेष्ठले प्रतिस्पर्धाविहीन भएको गोरखामा असाधारण मत संख्याले सत्ता गठबन्धनका उम्मेदवार जिताउनपुर्ने बताएका छन् ।

काठमाडौंंमा रहेका गोरखाका नेता-कार्यकर्तासँग गठबन्धन उम्मेदवारको भेटघाट कार्यक्रमलाई सम्बोधन गर्दै नेता श्रेष्ठले यस्तो बताएका हुन् ।

उनले यसअघि गोरखामा कांग्रेस र माओवादीको प्रतिस्पर्धा हुने तर यसपटक प्रतिस्पर्धाविहीन भए पनि असाधारण मत संख्याले उम्मेदवारले विजय हासिल गर्यो भनेर पुष्टि गर्नुपर्ने चुनौती रहेको बताए ।

उनले भने,‘गोरखामा विजय सुनिश्चित छ भनेर म एउटाले सक्रिय नभएर भोट नहालेर के हुन्छ र भनेर आआफनै घरतिरबस्ने काठमाडौंमा भएका मतदाताहरु यही बस्ने स्थिति भयो भने त्यो राम्रो हुँदैन । गोरखामा प्रतिस्पर्धा भनेकै कांग्रेस र माओवादीको  हुन्थ्याे । दुई वटै मिल्दा पनि यति आयो भन्यो भने के हुन्छ हामीलाई त्यसकारणले हामीलाई चुनौती पनि हो । प्रतिस्पर्धाविहीन भएको गोरखामा असाधरण मत संख्याले हाम्रा उम्मेदवारले विजय हासिल गर्यो भनेर पुष्टि गर्नुनै छ। ’

माओवादी केन्द्रको भोट कांग्रेसमा हस्तान्तरण हुन्छ कि हुदैन भन्ने पुष्टि गर्ने चुनौती रहेको समेत बताए ।