कास्की २ मा राप्रपाका पन्तको प्रतिबद्धता: टेक सिटी र निःशुल्क स्वास्थ्य परीक्षण

पोखरा । कास्की क्षेत्र नम्बर २ मा राष्ट्रिय प्रजातन्त्र पार्टीका प्रतिनिधिसभा उम्मेदवार हुन्, सुभर्णराज पन्त । राप्रपा कास्की जिल्ला सहसचिवसमेत रहेका ३२ वर्षीय पन्त युवाको साथ र मतले चुनाव जित्ने भन्दै चुनावी मैदानमा छन् । आफू ठूला एजेन्डा नबोकेको र जनताका सेवाका लागि साना तर महत्वपूर्ण एजेन्डा लिएर चुनावमा होमिएको पन्त बताउँछन् ।

पोखरालाई टेक सिटीका रुपमा विकास गर्ने लक्ष्य बोकेका पन्तले पोखरालाई डिजिटल पर्यटनको हब बनाउने सपना देखेका छन् । पन्त भन्छन्, ‘पोखरा पर्यटनको हब हो, अब यसलाई डिजिटल पर्यटनको हब बनाउन म टेक सिटीको नारा लिएर आएको हुँ ।’

सांसद निर्वाचित भए आफ्नो सचिवालय पोखरामा नै राख्ने र जनतासँग नजिक भइराख्ने उनको प्रतिबद्धता छ । ‘मेरा मतदाता मलाई खोजेर काठमाडौं जानुपर्ने अवस्था हुँदैन । पोखरामै सचिवालय खोलेर जनतासँग नजिक भएर बस्छु’, उनले भने ।

भ्रष्टाचारविरोधी कानून बनाउन आफ्नो जोड रहने पन्त बताउँछन् । स्वास्थ्यकर्मीसमेत रहेका पन्तले वर्षमा १ पटक सुगर, किड्नी र फोक्सोको निःशुल्क परीक्षण गर्ने व्यवस्था मिलाउने प्रतिबद्धता जनाएका छन् ।